ՀՅԴ ԳՄ անդամ, ԱԺ պատգամավոր Արա Նռանյանը կարծում է, որ ԼՂՀ ազատագրված տարածքները չեն վերաբնակեցվում երեք պատճառներով:
«Առաջին` իշխանությունները չեն գիտակցում, թե որքանով ազատագրված տարածքների վերաբնակեցումը կարող է ազդել հակամարտության կարգավորման ամբողջ գործընթացի վրա: Այնինչ միանշանակ է, որ ԼՂՀ բնակչության թվաքանակի ավելացումը և տարածքների վերաբնակեցումը կարող է վճռական դեր ունենալ և ամենակարևոր գործոնը հանդիսանալ խնդրի վերջնական լուծման համար»,- «Առաջին լրատվականի» հետ զրույցում ասաց նա:
Երկրորդ պատճառը, Արա Նռանյանի կարծիքով, հետևյալն է. «Իշխանությունները վախենում են կատարել այնպիսի քայլեր, որոնք կարող են հանգեցնել իրենց հասցեին օտարերկրացիների քննադատությանը: Սա իշխանության կողմից հերթական խնդրի սխալ ըմբռնումն է: Համոզված եմ, որ աշխարհի հզորները շատ կուզեին, որպեսզի մենք այդ հարցին վաղուց տված լինեինք այդպիսի լուծում` կանխորոշելով վերջնական կարգավորումը»:
Երրորդ` «Լինելով պետական դերակատարության նվազեցման կողմնակից, թերագնահատելով պետության և պետական մարմինների նշանակությունը երկրի զարգացման գործում և ամեն հնարավորը դիտարկելով բացառապես մասնավորի դերակատարման մեջ` մեր իշխանությունները նաև չեն պատկերացնում, թե ինչպես պետությունը պետք է իրականացնի վերաբնակեցման ծրագիրը»,- ասաց ՀՅԴ ԳՄ անդամը:
Պարոն Նռանյանը, սակայն, կարևորում է առաջին պատճառը. «Եթե գիտակցումը լինի, ցանկություն լինի, ապա և՛ վախը կարելի է հաղթահարել, և՛ այդ քաղաքականության իրականացման միջոցներն ու ուղիները գտնել»: