Թուրքիայի էներգետիկ ընկերությունները շարունակում են գնել իրանական նավթ և գազ` չնայած Թեհրանի դեմ Արևմուտքի երկրների ճնշմանը՝ հայտարարել է Թուրքիայի էներգետիկայի նախարար Թաներ Յըլդըզը:
«Մեկ քայլ հետ անելու հարցը չի քննարկվում: Բացի այդ, մեզ ոչ ոք չի էլ խնդրում նման քայլ անել»,- ասել է նախարարը:
Յըլդըզի խոսքով՝ ներկայում Թեհրանը մատակարարում է Թուրքիայում սպառվող գազի 20-30 տոկոսը:
Նախարարը նաև նշել է, որ թուրքական TUPRAS նավթավերամշակող ընկերությունը շարունակում է իրանական հում նավթ ներկրել:
«Ի տարբերություն որոշ եվրոպական երկրների` Թուրքիան այն երկիրը չէ, որը Իրանից ներկրում է իր պահանջարկի 3-5 տոկոսը»,- ասել է նախարարը:
Նրա խոսքով՝ անցած տարի սպառված վառելիքի ծավալի գրեթե կեսը Թուրքիան ներկրել է Իրանից: «Իրանը մեզ համար ներկրման կարևոր աղբյուր է»,- ասել է նա:
Interfax-ի փոխանցմամբ՝ ներկայում Իրանը Թուրքիայի էներգակիրների երկրորդ խոշորագույն մատակարարն է` Ռուսաստանից հետո:
