Այս տարի ևս հոկտեմբերի 2-ին մեկնարկեց ամերիկյան պետքարտուղարության կողմից անցկացվող «Գրին քարտի» խաղարկության գրանցման գործընթացը, որն իրականացվում է 1995-ից սկսած: «Գրին քարտի» խաղարկությամբ ամեն տարի ԱՄՆ ներգաղթի 55 հազար արտոնագիր է տրամադրվում ցածր ցուցանիշ ունեցող երկրների քաղաքացիներին: Այս խաղարկությամբ ոչ պակաս ոգևորվում են նաև հայերը՝ ամեն տարի պարտադիր լրացնելով խաղարկության հայտը:
Չնայած դեսպանատան կողմից մշտապես նշվում է, որ խաղարկությանը դիմելու գործընթացն անվճար է, սակայն Երևանում գործող մի քանի գրասենյակներում Գրին քարտի հայտը լրացնելու համար յուրաքանչյուր քաղաքացուց գանձվում է որոշակի գումար, որը սկսվում է 4000 դրամից:
Թե ինչ հիմունքներով են գործում այս գրասենյակները, որքանով է օրինական նրանց մատուցած ծառայությունը և դրա դիմաց գանձվող գումարը՝ փորձեցինք պարզել այդ գրասենյակներից մեկից, որը GreenCard.am կայքի միջոցով մատուցում է վերը նշված ծառայությունը: Ընկերությունը կոչվում էր «Գլոբալ Ար», որի տնօրենը՝ Քրիստինա Հակոբյանը, «Առաջին լրատվական»-ի հետ զրույցում նշեց, որ իրենց գործունեության մեջ դեսպանատան սահմանած կանոնների խախտում չկա: Իրենք մատուցում են նման ծառայություն, իսկ քաղաքացիներն էլ դիմում են՝ երբեմն ժամանակից շուտ դիմելով և հերթագրվելով ամիսներ առաջ:
«Ինքը՝ մուտքագրումն անվճար ծառայություն է, մարդն անվճար կարող է գրանցվել, պարզապես երբ դիմում են մեր ծառայությանը, մենք դրա համար գումար ենք գանձում: Մենք ավելի ստույգ ենք ինֆորմացիան գրանցում: Այսինքն՝ հավանականությունը, որ սխալ մուտքագրում կլինի, կամ այդ հաճախորդները խաղարկությունից դուրս կմնան՝ մեր դեպքում բացառվում է»,- ասաց տնօրենը՝ հավելելով, որ իրենք գիտեն՝ կան ուրիշ գրասենյակներ, որտեղ ավելի մեծ գումար են պահանջում:
«Կան բազմաթիվ մարդիկ, ովքեր լեզվային խնդիր ունեն, բավարար իմացություն չունեն, և այնպես չէ, որ մենք ապահովում ենք խաղարկության հաղթանակ: Պարզապես մենք մտածել ենք, որ դա մեր ծառայության դիմաց այն օպտիմալ գինն է, որը հավասարազոր է և չի խփում հաճախորդների գրպանին»,- նկատեց Քրիստինան:
Վերջինս նաև նշեց, որ այս տարի, նախորդ տարվա համեմատ, աճել է Գրին քարտի խաղարկության համար դիմող քաղաքացիների թիվը:
