ԱՄՆ-ը առաջիկա մի քանի շաբաթվա ընթացքում կարող է սկսել Ռուսաստանի դեմ պատժամիջոցների (որոնք մտցվել էին Ուկրաինայի հետ հակամարտության պատճառով) մեղմացման շուրջ բանակցություններ։ Սակայն եթե ընթացքում հրադադարի իրականացման առաջընթաց չլինի, որի մասին հակամարտող կողմերը Մինսկում պայմանավորվել են, հնարավոր են լրացուցիչ սահմանափակող միջոցառումներ։ Ինչպես հաղորդում է Reuters-ը, այսպիսի հայտարարություն է արել ԱՄՆ ազգային անվտանգության հարցերով խորհրդականի տեղակալ Թոնի Բլինքենը։
Նրա խոսքերով՝ ռուսական կողմից ակնկալում են, որ համաձայնագրի իրականացումը կսկսվի առաջիկա շաբաթների ընթացքում։ «Եվ եթե դա տեղի ունենա, մենք կարող ենք իրականում սկսել խոսել պատժամիջոցների վերացման մասին»,- հայտարարել է նա լրագրողներին։
Միաժամանակ, նա զգուշացրել է, որ եթե Մինսկի համաձայնագրի իրականացման ընթացքում չգրանցվի առաջընթաց, ապա խոսքը կվերաբերի ոչ միայն Ռուսաստանի նկատմամբ ճնշումները պահպանելուն, այլև պատժամիջոցների քաղաքականության խստացմանը։
Բլինքենի խոսքերով՝ անհրաժեշտ է, որպեսզի «ռուսական անձնակազմն ու տեխնիկան հեռանան Ուկրաինայից», սահմանը վերադարձվի ուկրաինական զորքերի հսկողությանը, ինչպես նաև բուֆերային գոտիներ հաստատվեն երկու կողմերում էլ։
