Грузия Online-ի փոխանցմամբ՝ Վրաստանի արդարադատության նախարար Տեյա Ծուլուկիանին լրագրողների հետ զրույցում հաստատել է, որ հարցաքննության համար դատախազություն է կանչվել Զուգդիդիի շրջանից մեծամասնական ընտրակարգով պատգամավոր ընտրված Ռոլանդ Ախալայան: Ծուլուկիանին ընդգծել է, որ դա կապված է Ախալայայի դատախազական գործունեության հետ.
«Չնայած իր պատգամավորական կարգավիճակին՝ Ախալայան, գործող օրենսդրությանը համապատասխան, պետք է հարցաքննության ներկայանա այսօր՝ նշանակված ժամին: Ախալայան հարցաքննության է կանչվել՝ կապված Սամեգրելո շրջանի դատախազի պաշտոնում տարած իր գործունեության հետ»:
Ռոլանդ Ախալայան հայտարարել է, որ չի պատրաստվում ներկայանալ հարցաքննության, և եթե հետաքննությունն ու դատախազությունը հարցեր ունեն իրեն, ապա դա կարող են անել հրապարակավ և ինքը նույնպես հրապարակավ կպատասխանի նրանց:
Նշվում է, որ Ռոլանդ Ախալայան Բաչո և Դատա Ախալայա եղբայրների հայրն է: Վրաստանի ներքին գործերի նախկին նախարար Բաչո Ախալայան ներկայումս ձերբակալված է, իսկ նրա եղբայր, պաշտպանության նախկին փոխնախարար Դատա Ախալայան ինտերպոլի միջոցով հայտարարված հետախուզման մեջ է գտնվում:
