Չարլզ Սփենսեր Չապլինը ծնվել է 1889թ.-ի ապրիլի 16-ին` էստրադային դերասանների ընտանիքում: Նրա ծնողները հաճախ են հյուրախաղերով մեկնել Եվրոպա և ԱՄՆ: Սակայն նրանց կարիերան ողբերգական ավարտ է ունեցել. ալկոհոլը չարաշահելու պատճառով հայրը կորցրել է ձայնը և մահացել, իսկ մայրը դրանից հետո խելագարվել է:
Այսպիսով Սիդ և Չարլի եղբայրները հայտնվեցին այնպիսի վիճակում, երբ պետք է հույսը դնեին միայն իրենց վրա:
Մանկության տարիներին Չարլին հաճախ էր ելույթ ունենում` կատարելով ծաղրածուի դեր, սակայն հետագայում նա ստիպված էր հրաժարվել ոչ միայն դրանից, այլև դպրոցից: Նա փորձում էր աշխատանք գտնել: 14 տարեկանում նա վերջապես հիմնական աշխատանքի անցավ թատրոնում: Տեքստերը սովորելու համար նրան օգնում էր եղբայրը, քանի որ Չարլին այդ ժամանակ կարդալ չգիտեր:
Որոշ ժամանակ անց նրան նկատում են նոր զարգացող կինոստուդիայի ներկայացուցիչները: Չապլինը ոչ միայն դերասան, այլև շատ ֆիլմերի հեղինակ է: Նա ինքն էր գրում սցենարները, նկարահանում ֆիլմերը, խաղում գլխավոր դերերում:
1917թ.-ին նա կինոյի պատմության մեջ ամենաթանկ վճարվող դերասանն էր՝ First National Pictures-ի հետ ստորագրել էր մեկ միլիոն դոլար արժողությամբ պայմանագիր:
Չնայած կինոն շուտով դարձավ հնչյունային, իսկ այնուհետև` գունավոր, այնուամենայնիվ` Մեծ Վարպետի կողմից ստեղծված կերպարները դասական են և մինչ այժմ օրինակ են ծառայում:
Չապլինը ամուսնացել է չորս անգամ և 11 երեխա ունեցել: Չապլինի չորրորդ կինը նրանից 37 տարով փոքր էր և նրան վերջին երեխան է պարգևել, երբ մեծագույն կատակերգակը արդեն 72 տարեկան էր: Չարլի Չապլինը մահացել է 1977թ. դեկտեմբեր 25-ին` 88 տարեկանում:
