1975-ի հոկտեմբերի 5-ին ծնվել է Քեյթ Էլիզաբեթ Ուինսլեթը` Մեծ Բրիտանիայի Ռիդինգ քաղաքում, դերասանի ընտանիքում:
Բեմի նկատմամբ Քեյթն ունեցել է մեծ ձգտում և 11 տարեկանից սովորել է դերասանուհու մասնագիտությունը: 12 տարեկանում նա առաջին անգամ տեսախցիկի առջև է կանգնել՝ նկարահանվելով գովազդում:
Առաջին անգամ ֆիլմում նկարահանվել է 1994-ին՝ Փիթեր Ջեքսոնի «Երկնային արարածներ» ֆիլմում, որին հաջորդել են մի շարք այլ ֆիլմեր:
Քեյթը համաշխարհային համբավ է ձեռք բերել 1997-ին՝ նկարահանվելով ռեժիսոր Ջեյմս Քեմերոնի «Տիտանիկ» ֆիլմում՝ խաղալով Լեոնարդո Դի Կապրիոյի հետ: Ֆիլմը նվաճել է ռեկորդային թվով կինոմրցանակներ, այդ թվում՝ 11 «Օսկար»:
1998-ի նոյեմբերի 22-ին տեղի է ունեցել Քեյթի և Ջիմ Թրիփլթոնի պսակադրության արարողությունը, իսկ 2000-ի հոկտեմբերին ծնվել է նրանց դուստրը: 3 տարի անց նրանք ամուսնալուծվել են: 2003-ին Ուինսլեթն ամուսնացել է ռեժիսոր Սեմ Մենդեսի հետ, նրանք ունեցել են որդի: 2010-ին, սակայն, նրանք ամուսնալուծվել են, իսկ 2012-ին Քեյթն ամուսնացել է երրորդ անգամ՝ այս անգամ միլիոնատեր Նեդ Ռոքնռոլի հետ, և մեկ տարի անց նրանք որդի են ունեցել:
2009-ը դերասանուհու համար եղել է հաղթական տարի՝ նա արժանացել է «Օսկարի»:
