ՀՀՇ 17-րդ համագումարին մասնակցելու հրավեր ստացած ԲՀԿ-ն այսօր չմասնակցեց համագումարին: «Առաջին լրատվական»-ն այս մասին պարզաբանում ստացավ ԲՀԿ առաջնորդ Գագիկ Ծառուկյանի մամլո խոսնակ Իվետա Տոնոյանից:
Նա նշեց, որ ԲՀԿ-ն շնորհակալ է այն բոլոր կուսակցություններին, որոնք ԲՀԿ-ին իրենց համագումարի մասնակցության հրավեր են ուղարկել: «Քանի որ ԲՀԿ-ն հայտարարել է, որ նախընտրական գործընթացների չի մասնակցելու, այդ իսկ պատճառով որոշում է կայացրել չմասնակցել կուսակցությունների համագումարներին, որոնք այս փուլում հիմնականում անցկացվում են հենց նախագահական ընտրությունների համատեքստում»,- մեկնաբանեց Իվետա Տոնոյանը:
Հիշեցնենք, որ այսօր «Առաջին լրատվական»-ի հետ զրույցում ՀՀՇ վարչության անդամ Արամ Մանուկյանը տեղեկացրել էր, որ համագումարին մասնակցելու հրավերներ են ստացել ՀԱԿ բոլոր կուսակցությունները, խորհրդարանական ոչ իշխանական բոլոր խմբակցությունները, այսինքն` ՀՅԴ-ն, «Ժառանգությունը» և ԲՀԿ-ն ու ՀԱԿ անդամ կուսակցությունները:
