Ուզբեկստանի նախագահի դուստր Գյուլարա Քարիմովան հանցավոր գործունեության համար կասկածվող մասնակիցներից մեկն է: Այս մասին հայտնում է երկրի Գլխավոր դատախազության մամլո ծառայությունը՝ փոխանցում է «Նեզավիսիմայա գազետան»:
Հաղորդագրությունում նշվում է, որ Քարիմովայի մոտ գործընկերները՝ Գայանե Ավագյանը, Ռուստամ Մադումարովը, Նուրմուհամմադ Սադիկովը, պետությանն ավելի քան 152 մլն դոլարի վնաս են հասցրել: Գերատեսչության տվյալներով՝ նրանք զբաղվել են իջեցված գներով պետական ակտիվների ձեռքբերմամբ, դրանք յուրացրել ու գողացել, իրականացրել ֆինանսա-տնտեսական այլ խարդախություններ:
Ենթադրյալ կազմակերպված խմբի անդամների մեծ մասի գործերն արդեն ուղարկվել են դատարան: Հղում անելով քննչական գաղտնիքին՝ մամլո ծառայությունը հայտնում է, որ քրեական գործի նյութերում առկա են Քարիմովան և այլ անձինք: Գլխավոր դատախազության փոխանցմամբ՝ Քարիմովայի դուստրը՝ Իմանը, կապ չունի քրեական գործերի հետ: Դատախազությունը նաև հերքում է մամուլում արված հայտարարությունները, որ նա պահվում է տնային կալանքի տակ: Այս տարի նա դառնում է 16 տարեկան:
