Բաշկիրիայի էներգետիկ ձեռնարկությունների բաժնետոմսերի գողության գործը, ինչպես հայտնել են Vedomosti-ի զրուցակիցները, զարգացել է հետևյալ կերպ. այս տարվա ապրիլին Բաշկիրիայի նախկին սենատոր Իգոր Իզմեստևը, որը 2007 թվականից ցմահ ազատազրկման պատիժն է կրում մի շարք ծանր հանցագործությունների համար, ցուցմունք է տվել այն մասին, որ «Սիստեմա» ֆինանսա-արդյունաբերական խմբի ներկայացուցիչները Լևոն Հայրապետյանի միջնորդությամբ օգնել են Ռախիմով կրտսերին (Բաշկիրիայի նախկին նախագահ Մուրտազա Ռախիմովի որդին)՝ օրինականացնել 7 մլրդ ռուբլու չափով Բաշկիրայից հափշտակված սեփականությունը: Դա տեղի է ունեցել 2009 թվականին՝ «Սիստեմայի» կողմից Բաշկիրիայի վառելիքա-էներգետիկ համալիրի ձեռնարկությունների բաժնետոմսերի ձեռքբերման գործարքի ժամանակ:
Իզմեստևի ցուցմունքները բավարար համոզիչ չէին, քանի որ 2009-ին, երբ գործարքը կատարվել է, նա արդեն ազատզրկման պատիժն էր կրում: Ցուցմունք է տվել ևս մեկ ականատես, որը ծանոթ է գործարքի բանակցություններին: Նա Ալեքսանդր Յակուբովն է, որը 2001-2005 թթ. եղել է Դաշնային խորհրդում Բաշկիրիայի նախարարների կաբինետի ներկայացուցիչ:
Ռախիմով կրտսերի կազմակերպած խումբը 2003 թվականին սեփակաշնորհման ժամանակ գողացել է 6 ձեռնարկությունների բաժնետոմսերի խոշոր փաթեթներ: Նույն տարի Հաշվիչ պալատի ստուգումների արդյունքում պարզվել է, որ բաժնետոմսերն անօրինական կերպով են դուրս բերվել պետական սեփականությունից: Հարուցվել են քրեական գործեր, սկզբում՝ քրեական, հետո՝ հարկային և արբիտրաժային: Ռախիմովն իր խնդիրների լուծման համար ներգրավել է Հայրապետյանին, որը լայն կապեր ուներ իշխանության մարմիններում:
Նա ազդեցություն է ցուցաբերել չպարզված պաշտոնատար անձանց վրա, ովքեր ձգտում էին Մոսկվայի արբիտրաժային դատարանի կողմից 2006-ին բաշկիրյան ձեռնարկությունների վրա դրված կալանքի հանման: Դա թույլ է տվել բաժնետոմսերը փոխանցել բարեգործական հիմնադրամներ, որոնք ստեղծվել էին Ուրալ Ռախիմովի օգնությամբ, այնուհետև՝ մի քանի կոմերցիոն ֆիրմաների: Գողացված սեփականությունն օրինականացնելու նպատակով Ռախիմովն ու Հայրապետյանը գտել են «Սիստեմայի» ներկայացուցիչներին, ովքեր հետաքրքրված էին ձեռնարկությունների գնմամբ, և 2009 թվականին 2 մլրդ դոլարով վաճառել նրանց բաժետմսերի վերահսկիչ փաթեթները: Քննությունն այդ գումարը նվազեցված է համարում: Փոխանցումները կատարվել են Շվեյցարայի, Ավստրիայի և Հայաստանի բանկերում Հայրապետյանի հաշիվների միջոցով: Հայրապետյանն անձամբ միջնորդության համար 50 մլն դոլար է ստացել՝ հաստատում է քննությունը:
Հայրապետյանի ներկայացուցիչները մեղադրանքները չեն մեկնաբանում:
