Շուրջ հարյուր հազար պաղեստինցիներ լքել են Դամասկոսի մոտ գտնվող պաղեստինցի փախստականների «Յարմուկ» ճամբարը: Պատճառը կառավարական ուժերի և զինված ընդդիմության միջև ընդհարումներն են, որոնց հետևանքով փախստականների շարքում բազմաթիվ զոհեր կան: Այս մասին հայտնում է RIA Novosti-ն՝ հղում անելով Սիրիայում ՖԱԹՀ շարժման ներկայացուցիչ Սամիր Ալ-Ռիֆայիին:
Նրա խոսքով՝ Սիրիայում պաղեստինցիների խոշորագույն ճամբարը վերահսկում են Սիրիայի ազատ բանակի ներկայացուցիչները՝ այնտեղից դուրս մղելով «Պաղեստինի ազատագրման ազգային ճակատ» խմբավորման ակտիվիստներին, որոնք սատարում են Բաշար Ասադի ռեժիմին:
«Ներկայում «Յարմուկ» ճամբարը դատարկվում է: Բնակիչների 90 տոկոսից ավելին լքել են իրենց տները՝ տեղափոխվելով Սիրիայի անվտանգ վայրեր, ինչպես նաև Լիբանան, որտեղ իշխանությունները չեն խոչընդոտում իրենց մուտքը»,- ասել է Ալ-Ռիֆային՝ հավելելով, որ այժմ բանակցություններ են տարվում ճամբարի ապառազմականացման շուրջ, որպեսզի փախստականները կարողանան վերադառնալ:
ՖԱԹՀ-ի ներկայացուցչի տվյալներով՝ ճամբարի մարտերում զոհվել է շուրջ 30 մարդ:
Սիրիայում կա կես միլիոն պաղեստինցի փախստական, որից ավելի քան 100 հազարը կենտրոնացած էին Դամասկոսից մի քանի կմ հարավ տեղակայված «Յարմուկ» ճամբարում:
