Թուրքական Anadolu լրատվական գործակալության փոխանցմամբ՝ Թուրքիայի Օդա-տիեզերական տեխնոլոգիաների գիտահետազոտական կենտրոնը (UZAYTEM) և Թուրքիայի օդագնացության և տիեզերագնացության արդյունաբերություն ընկերությունը (TUSAŞ) համատեղ պատրաստվում են արտադրել նոր տիպի անօդաչու թռչող սարք:
Վերջինս իր նախորդներից տարբերվելու է իր բազմաֆունկցիոնալությամբ: Նոր ԱԹՍ-ի երկարությունը կազմելու է 6 մետր, իսկ ընդհանուր քաշը՝ 150 կիլոգրամ: Նոր ԱԹՍ-ի փորձարկումներն իրականացվելու են 2013 թվականի օգոստոսին:Եթե նոր ԱԹՍ-ի ստեղծումն ընթանա հաջող, ապա TUSAŞ-ը մտադիր է դրա զանգվածային արտադրությունը սկսել մինչև 2014 թվականը:
Դա կլինի թուրքական արտադրության երրորդ ԱԹՍ-ն: Սրանից առաջ Թուրքիան թողարկել է ANKA ԱԹՍ-ն, որի ստեղծման աշխատանքները մեկնարկել են 2004 թվականին: Այս նախագծի վրա աշխատել է մոտ 180 ինժեներ: ANKA-ն դասվում է միջին բարձրությամբ և թռիչքի մեծ տևականությամբ ԱԹՍ-երի շարքերին:
Իսրայելական Heron ԱԹՍ-ի համեմատ, ANKA-ն ունի մի շարք առավելություններ: Եթե Heron-ը կարող է 30,000 մետր բարձրության վրա հանել 185 կիլոգրամից ոչ ավել օգտակար բեռ, ապա ANKA-ի պարագայում այդ ցուցանիշը գերազանցում է 200 կիլոգրամը:
Ներկայումս Թուրքիան աշխատանքներ է տանում իր երկրորդ ԱԹՍ-ի՝ «Շիմշեքի» (Կայծակ) մշակման վրա: Այս ԱԹՍ-ի երկարությունը կազմելու է 2.3 մետր, թևերի բացածքը՝ 1.5 մետր, առավելագույն թռիչքային քաշը՝ 75 կիլոգրամ, արագությունը՝ 740 կմ/ժամ:
