Թուրքական Doğan լրատվական գործակալության փոխանցմամբ, քրդական «Խաղաղություն և ժողովրդավարություն» կուսակցությունը ներկայացնող, Ստամբուլից ընտրված կին խորհրդարանական Սեբահաթ Թունջելը Ստամբուլի Բիլգի համալսարանում մասնակցել է «Ազատություն մայրենի լեզվով (քրդերենով) ուսուցմանն ու մահմեդական գլխաշորին» խորագրով կոնֆերանսին:
Հիշեցնենք, որ Թունջելը, 2 օր առաջ երկրի հարավ-արևելյան հատվածում գտնվող Շրնաք նահանգի Սիլոփի շրջանում մասնակցելով Նովրուզի տոնակատարությանը, խիստ դժգոհ էր մնացել թուրք իրավապահների գործողություններից, ինչի համար էլ նախ բանավիճել էր Անվտանգության ուժերի գլխավոր կոմիսարի հետ, ապա նաև ապտակել էր նրան:
Կոնֆերանսի դահլիճում Թունջելը նշել է. «Ես ձեզ վստահեցնում եմ, որ չեմ ցանկացել ապտակել ոստիկանության աշխատակցին, չէ՞ որ նա ընդամենը ոստիկան է: Ես դրանով ապտակ եմ հասցրել պետությանը»:
Թունջելի այս խոսքերը հարուցել են դահլիճում հավաքված մի խումբ ուսանողների զայրույթը, որոնք բողոքի ակցիա են ձեռնարկել Թունջելի դեմ: Մթնոլորտի շիկանալուն պես գործին միջամտել են անվտանգության աշխատակիցները և նրանց հեռացրել դահլիճից:
Հիշեցնենք, որ «Ազգայնական շարժում» կուսակցության նախագահ Դևլեթ Բահչելին հայտարարել է, որ Թունջելը պատասխան է տալու իր արարքի համար և խոստացել անձամբ կոտրել նրա ձեռքերը:
