Այսօր կրկին Ագրարային համալսարանի պրոֆեսորադասախոսական կազմն ուսանողների ուղեկցությամբ բողոքի ակցիա էր կազմակերպել ՕԵԿ-ի գրասենյակի բակում, իսկ պատճառը համալսարանի և կուսակցության գրասենյակի մեջտեղում գտնվող վիճահարույց տարածքն է: Տարածքի հետ կապված վեճը դատարանում է, և համալսարանի ղեկավարությունը պնդում է չիրականացնել որևէ շինարարական աշխատանք՝ մինչև չլինի դատարանի որոշումը: Շինարարություն, սակայն, ՕԵԿ-ականների կողմից իրականացվել է, և երկհարկանի շենքն արդեն կանգուն է:
«Բուհն ընդվզում է այս ապօրինության դեմ և թույլ չի տա, որ մեր ուսանողների տերիտորիան խլեն մեզանից: Մենք պահանջում ենք, որ Ագրարային համալսարանի տարածքից առհասարակ հեռացնեն ՕԵԿ-ին պատկանող ցանկացած կառույց, այդ թվում՝ կենտրոնական գրասենյակը: Եթե այս անօրինական շինարարությունը շարունակվի, և սեպտեմբերի 1-ին այս շենքն այստեղից չվերանա, այն մեծ շարժումների տեղիք կտա: Սեպտեմբերի 1-ին ուսանողական մեծ շարժում կսկսվի բոլոր անօրինությունների դեմ»,- «Առաջին լրատվական»-հետ զրույցում ասաց Ագրարային համալսարանի քիմիայի ամբիոնի վարիչ, պրոֆեսոր Քամալյանը:
Նշենք, որ տարածքը հսկում էին մեծաթիվ ոստիկաններ և քաղաքապետարանի աշխատակիցներ, ովքեր մեկ անգամ արդեն ՕԵԿ-ին 200 հազար դրամով տուգանել են՝ հակառակ դատարանի որոշման շինարարական աշխատանքներ կատարելու համար: Այնուհետև կրկնակի արձանագրություն է կազմվել, որի հետ կապված հարցն այսօր պետք է քննարկվի քաղաքապետարանում:
ՕԵԿ պատգամավոր Հովհաննես Մարգարյանը, սակայն, համաձայն չէ այս բարձրացված աղմուկի հետ: Նա օրերս արխիվից ձեռք է բերել համապատասխան փաստաթղթեր, որոնք փաստում են, որ 2008 թվականին իրենք այդ տարածքում ստացել են 4 հարկանի շենք կառուցելու թույլտվություն, համապատասխանաբար նաև՝ ճարտարապետաշինարարական հատակագիծ:
«Մեզ հաջողվեց ստանալ համապատասխան փաստաթղթեր, որ 2008 թվականին Երևանի քաղաքապետարանը որոշում է կայացրել տարածքը մեզ հատկացնել: Դա կատարվել է Ագրարային ակադեմիայի համաձայնությամբ: Ակադեմիայի տնօրինությունը Թարվերդյանի ստորագրությամբ տվել է իր համաձայնությունը նույն թվականի սեպտեմբեր ամսին: Դա հիմք է հանդիսացել, որ քաղաքապետարանը որոշում կայացնի տարածքը հատկացնել ՕԵԿ-ին, որից հետո մենք կնքել ենք պայմանագիր, և առ այսօր ակադեմիան չի կարող կողմ հանդիսանալ այս հարցում: Ագրարային համալսարանը իր տված համաձայնությունից հետո այլևս կողմ չի հանդիսանում»,- «Առաջին լրատվական»-ի հետ զրույցում ասաց Հովհաննես Մարգարյանը:
Վերջինս մեզ հետ զրույցում ասաց, որ բուհի ղեկավարությունը ուսանողներին շենքի տարածքում աղմուկ բարձրացնելու է բերում որոշակի պայմանավորվածության դիմաց: Նրանք այսօր լսել են, որ ուսանողներից մի քանիսն ասել են՝ «ջանդամ, զատո մեր գնահատականը կդնեն՝ կգնանք, լիկվիդ չենք մնա»:
Այդ փաստի վերաբերյալ ՕԵԿ-ը դիմել է դատախազություն, որպեսզի դատախազությունը պարզի, թե ուսանողներն ինչ հիմունքներով են մասնակցել այդ միջոցառումներին:
