ԱՄՆ իշխանությունները ծրագրում են ավելացնել ռազմական ինքնաթիռների և զինծառայողների թիվը, որոնք ռոտացիոն կարգով Ավստրալիայի ռազմաօդային ուժերի Դարվին քաղաքի մոտ գտնվող ռազմաբազայում են: Այս մասին հայտնում է Wall Street Journal-ը:
Պարբերականը նշում է, որ ռազմական ներկայության ընդլայնումը կքննարկվի ԱՄՆ պետքարտուղար Ջոն Քերիի և պաշտպանության նախարար Չակ Հեյգելի Ավստրալիա այցի ընթացքում:
Սպասվում է, որ այս շաբաթ երկու երկրների ներկայացուցիչները կայցելեն Դարվինի հարևան ռազմաբազա, որտեղ կհետևեն Ասիայում խոշորագույն ռազմաօդային ուսումնավարժանքներից մեկի՝ Pitch Black-ի ընթացքին, որոնց մասնակցում են ԱՄՆ-ի, Սինգապուրի, Ֆրանսիայի, Թաիլանդի, ԱՄԷ-ի, Նոր Զելանդիայի, Ավստրալիայի ռազմաօդային ուժերը:
Պարբերականի տվյալներով՝ ամերիկացիները ծրագրում են Դարվին քաղաքի մոտ գտնվող ռազմաբազայում զինծառայողների թիվն ավելացնել ավելի քան 2 անգամ՝ մինչև 2500: Ներկայումս այնտեղ մոտ 1100 ամերիկացի զինվորական կա:
«Հետաքրքրությունը տակտիկական օդուժի մեջ է, Ավստրալիայի և ԱՄՆ ռազմաօդային ուժերի ավելի սերտ համագործակցության մեջ»,- թերթին ասել է Պենտագոնի այցի օրակարգին ծանոթ ներկայացուցիչը:
