ԱՄՆ Սենատն ուղղում է մտցրել 2013 թվականին պաշտպանական բյուջեում՝ Պենտագոնին պարտավորեցնելով վերանայել Սիրիայի հակամարտությանը ռազմական միջամտություն ցուցաբերելու հնարավորությունը: Ի թիվս այլ սցենարների՝ սենատորները խնդրում են գնահատել Սիրիան «ոչ թռիչքային գոտի» հայտարարելու հեռանկարները, Սիրիայի հարևան երկրներում հակաօդային պաշտպանության միջոցների տեղակայման հնարավորությունները և սիրիական ավիացիայի դեմ ամերիկյան ռազմաօդային ուժերի կիրառումը:
Թեև փաստաթղթում ասվում է, որ խոսքը պատերազմի հայտարարման մասին չէ, օրինագիծը լրջորեն մոտեցնում է ԱՄՆ-ին սիրիական ճգնաժամի ռազմական սցենարով լուծման: Այս մասին հայտնում է Kommersant-ը:
Ուղղումը, որն առաջարկել էին սենատորներ Ջոն Մաքքեյնն ու Ջո Լիբերմանը, հաստատվել է մի քանի րոպեի ընթացքում: Օրինագծի կողմնակիցների կարծիքով՝ ԱՄՆ-ն մինչ օրս ոչ մի իրական գործողություն չի ձեռնարկել Սիրիայում ռեժիմի փոփոխման համար, այնպես որ Պենտագոնին տրված հանձնարարականը պարզապես թույլ կտա «խելամիտ գնահատել» հակամարտությունում ռազմական միջամտության հեռանկարները:
Օրինագիծն ընդունվել է 92 կողմ և 6 դեմ ձայներով:
Միևնույն ժամանակ սիրիական իշխանությունները ընդունել են 631 մլրդ դոլար ծավալով ռազմական բյուջեն, որի մեծ մասը կծախսվի նոր սպառազինության ձեռքբերման և զինառայողների աշխատավարձերի բարձրացման վրա:
Ինչպես կարծում են սենատորները, պաշտպանական բյուջեի նախագիծը կարող է մոտ ժամանակներս համաձայնեցվել Կոնգրեսի հետ և մինչև տարեվերջ հաստատվել նախագահի կողմից:
