Վրաստանի նախկին վարչապետ Վանո Մերաբիշվիլին, որը ներկայում «Միացյալ ազգային շարժում» նախկին իշխող կուսակցության գլխավոր քարտուղարն է, ՆԳՆ շենքը լքել է կեղծ փաստաթղթերի օգտագործման և պետական սահմանն ապօրինի հատելու փորձի գործով երկժամյա հարցաքննությունց հետո: Այս մասին հայտնում է Novosti-Gruziya գործակալությունը:
Նախարարության տվյալներով՝ Մերաբիշվիլին փորձել է Երևան գնալ վրացական պետական պատվիրակության կազմում՝ Լևան Մայսուրաձե անվամբ անձնագրով, որում, սակայն, նրա լուսանկարն է փակցված եղել: Նրան չեն ձերբակալել օդանավակայանում, որպեսզի չխաթարեն պետական այցը և հնարավորություն տան ներկայացնելու իրական անձնագիրը՝ նշվում է ՆԳՆ-ի հայտարարությունում:
«Ինձ հաճելի էր գտնվել Վրաստանի ՆԳՆ-ում, սակայն, ցավոք սրտի, նոր կառավարության պայմաններում ներքին գործերի նախարարությունը օգտագործվում է որպես «մեքենա` ռեպրեսիայի համար»,- լրագրողներին ասել է Մերաբիշվիլին՝ չմեկնաբանելով այնտեղ ունեցած զրույցի բովանդակությունը:
Վրաստանի նախագահ Միխեիլ Սաակաշվիլին հույս է հայտնել, որ Մերաբիշվիլիի դեմ քննությունը կդադարեցվի, և հայտնել է, որ նոր կառավարության կողմից արձանագրվում են «քաղաքական հետապնդման փաստեր»:
«Գաղափարը, թե Վանո Մերաբիշվիլին կարող էր նման պաշտոնական այցի ժամանակ կեղծ անձնագիր օգտագործել, այնքան անմիտ է, որ դժվար է մեկնաբանել: Միայն հիմար մարդիկ կարող են մտածել, որ Մերաբիշվիլին, որին ողջ Վրաստանը գիտի, իբր թե փորձել է սահմանը հատել կեղծ անձնագրով, որպեսզի բաց հանդիպումներ անցկացնի եվրոպական հեռուստատեսախցիկների առջև»,-ասվում է նախագահի հայտարարությունում, որը զետեղված է Facebook սոցցանցի նրա էջում:
