Գործարարներին հարկային դաշտ հրավիրելու և ստվերից դուրս գալու վարչապետի հայտարարություններին զուգընթաց այս օրերին բավական մեծ թիվ են կազմում տնտեսվարողների դեմ ՊԵԿ-ի դատական հայցերը դատարաններում: Խոսքը գումարների բռնագանձման պահանջով ընկերությունների և անհատ ձեռներեցների դեմ վարչական հայցերի մասին է: Դատական հայցերի քանակով ՊԵԿ-ը, թերևս, զիջում է միայն ոստիկանությանը:
Ֆինանսների նախարարության հետ միավորված հարկային պետական տեսչությունն այս օրերին միլիոնավոր դրամների պահանջներ է ներկայացրել տնտեսվարողներին:
Օրինակ՝ Ավան-Առինջում գրացված «Վառադ» ընկերությունից ՊԵԿ-ը պահանջում է բռնագանձել 268 մլն 554 հազար դրամ՝ որպես հարկային պարտավորություն, «Դվին կոնցեռնից»` 86 մլն 404 հազար դրամ, «Բիզի գրուպ» ընկերությունից՝ 16 մլն 814 հազար դրամ, «Բյուրակն» ՍՊԸ-ից՝ 14. 5 մլն դրամ, «Եղվարդ համալիրից»` 11. 9 մլն դրամ, «Ֆիրմա ֆլամինգո» ընկերությունից՝ 3 մլն 292 հազար դրամ, «Սուն-Սան» ընկերությունից ՊԵԿ-ը պահանջում է բռնագանձել 1 մլն 858 հազար դրամ, «Արմեն Արսենի մոտ» ՍՊԸ-ց՝ 1.6 մլն դրամ, «Վարդան Փեփոյան» ընկերությունից ՊԵԿ-ի պահանջը բավարարելու դեպքում պետք է բռնագանձվի 7 մլն 272 հազար դրամ, «Արնիս ֆարմ» ՓԲԸ-ից՝ 458 հազար դրամ, «Զիմունեքս» ընկերությունից՝ 501 հազար դրամ, «Ան Ջոն» ընկերությունից՝ 3 մլն 222 հազար դրամ, «Մետալլեքս» ՍՊԸ-ից՝ 8 մլն 50 հազար դրամ, «Արման» ընկերությունից` 727 հազար դրամ, «Մասթեր լայն» ընկերությունից պետք է, ըստ ՊԵԿ-ի, բռնագանձել 927 հազար դրամ, «Թեմ թրասթ»-ից` 1.1 մլն դրամ և այսպես շարունակ:
Գործարար հավասար պայմանների մասին հայտարարող կառավարությունը չի մոռացել նաև անհատ ձեռներեցներին. Վարչական դատարանում այս օրերին քննվում են ՊԵԿ-ի մի քանի տասնյակ հայցեր ԱՁ-ների դեմ: Ալինա Մխիթարյան անհատ ձեռներեցից ՊԵԿ-ը Վարչական դատարանում պահանջում է բռնագանձել 425 հազար դրամ, ԱՁ Հարություն Միրոյանից ՝ 499 հազար դրամ, ԱՁ Նորայր Ալեքսանյանից՝ 416 հազար դրամ, անհատ ձեռներեց Ռաֆիկ Բարսեղյանից ՊԵԿ-ը պահանջում է բռնագանձել 352 հազար դրամ, Անդրանիկ Բաղդասարյան անհատ ձեռներեցից՝ 809 հազար դրամ, ԱՁ Դավիթ Նիկոլյանից՝ 382 հազար դրամ և այլն:
ՊԵԿ-ի դատական հայցերի պատասխանողների ցանկից երևում է, որ հիմնական թիրախը փոքր ու միջին բիզնեսն է: Վերոնշյալ գործերը դեռ Վարչական դատարանում են և դրանցով դեռ վճիռներ չկան: Կան նաև գործարարներ, որոնք հակընդդեմ հայցեր են ներկայացնում, բայց դրանք շատ քիչ են՝ բառացիորեն մի քանիսը:
Հիշեցնենք, որ Ֆինանսների նախարարությունը օրերս հրապարակել է հարկ վճարողների հետ իրականացված աշխատանքների հաշվետվությունը՝ ցույց տալու համար, թե որքան հարկ են ստվերից դուրս բերել: Այդ հաշվետվությամբ ֆիննախը ներկայացնում է, որ առանձնացվել են առավել ռիսկային 1200 հարկ վճարողներ, որոնց մոտ իրականացվել են ստուգումներ: Իսկ այդ 1200-ից 98 տնտեսվարողներ 2014 թվականի ընթացքում տարեկան շահութահարկի հաշվարկներով շահութաբերության ցածր ցուցանիշ են հայտարարագրել, ինչը ճշգրտված հաշվարկների արդյունքում կազմել է 391 միլիոն 655 հազար դրամ լրացուցիչ շահութահարկ: Այդ գումարից ավելի քան 268 միլիոն դրամը բաժին է ընկնում 15 հարկ վճարողների: Սա նշանակում է, որ 2014 թվականի ընթացքում այդ 98 կամ 15 ընկերությունները պետությունից թաքցրել են 391 մլն կամ 268 մլն դրամ շահութահարկ:
Ֆիննախն իր հաղորդագրության մեջ նշել է միայն այս վերջին 15 տնտեսվարողների անունները: Դրանցից ամենաշատ՝ 57,3 մլն դրամ շահութահարկ թաքցրել է բենզինի բիզնեսով զբաղվող «ՍԻՊԻԷՍ ՕԻԼ ՔՈՐՓՈՐԵՇՆ» ընկերությունը: Երկրորդը «Ադամիում» ընկերությունն է` 36 մլն թաքցրած շահութահարկով: Երրորդը տեխնիկայի ներկրմամբ և վաճառքով զբաղվող «Արայ» ընկերությունն է` 35,7 մլն դրամ թաքցրած շահութահարկով: Իսկ չորրորդ և հինգերորդ տեղերում են «Արաքս թռչնաֆաբրիկան»` 32,6 մլն և «Ֆիրմա Գ.Ա.Խ.»-ն` 31,1 մլն դրամ շահութահարկով:
