Facebook-ն ընտրություններին ավելի շատ օգնում է, քան խանգարում: Նման կարծիք «Առաջին լրատվական»-ի հետ զրույցում հայտնեց տեղեկատվության անվտանգության հարցերով փորձագետ Սամվել Մարտիրոսյանը:
«Facebook-ը հասարակական-քաղաքական կյանքը դարձնում է ավելի թափանցիկ: Օրինակ, ընտրությունների ժամանակ սոցիալական այս ցանցի միջոցով հանրությունն ավելի շատ է կարողանում իրազեկվել խախտումների մասին: Դրական է նաև այն առումով, որ քաղաքական գործիչներն այսօր կարողանում են Facebook-ում հավաքել իրենց համար համախոհներ: Օրինակ՝ Ստյոպա Սաֆարյանն այսօր իր քարոզարշավի մի մասն անցկացնում է Facebook-ում: Այս սոցիալական ցանցնամենաէժան քաղաքական գովազդի միջոցն է:
Մյուս կողմից՝ այն ունի նաև իր բացասական կողմերը:Շատ են ստեղծվում կեղծ հաշիվներ, որոնց միջոցով էլ տարածվում է կեղծ տեղեկատվություն՝ հիմնականում քաղաքական հարցերի շուրջ: Ի վերջո,Facebook-ն է որոշում՝ մենք մեր ընկերների որ գրառումները կարող ենք տեսնել, որը՝ ոչ:Այսինքն ավելի «մութ» գաղափար ունեցողների համար հարմարավետ գործիք է այն»:
Տաջիկստանում Facebook-ն ընդհանրապես արգելել են: Մեր այն հարցին, թե ճիշտ կլինի՞ արդյոք, եթե Հայաստանում էլ փակեն,Սամվել Մարտիրոսյանը պատասխանեց. «Տաջիկստանն այն երկիրն է, որից մենք պետք է օրինակ վերցնենք միայն գազի գնի էժան լինելու առումով: Այնտեղ մարդու ազատությունն ամեն կերպ խեղդված է, և սոցիալական ցանց փակելն էլ դրա վառ օրինակն է: Ես կարծում եմ, որ Հայաստանում ոչ միայն չի կարելի փակել սոցիալական ցանցերը, այլև կոպիտ սխալ կլինի նման բան անելը»:
