Նյու Ջերսիում տեղակայված Ամերիկյան հրեական ոչ պետական կրոնական կազմակերպությանը մեղադրում են խարդախության մեջ: Այս մասին հայտնում է ABC News-ը: Նահանգային դատարանը քննում է կոլեկտիվ հայցը:
Հայցվոր են հանդիսանում 4 երիտասարդներ և նրանցից երկուսի մայրերը: Նրանք խարդախ են անվանել ինչպես Jews Offering New Alternatives for Healing (JONAH) կազմակերպության մեթոդները, այնպես էլ նրա երկու ներկայացուցիչների խոսքերը: Վերջիններս գեյերին խոստացել էին փոխել նրանց սեռական կողմնորոշումը՝ խորհրդակցությունների շարքից հետո:
Հայցվորների խոսքով՝ թերապիայի ընթացքում JONAH-ի ներկայացուցիչները առաջարկել են նրանց հանվել, ագրեսիա են խթանել, ստիպել հայհոյել:
Նման խորհրդակցություններից մեկին մասնակցել են երկու անչափահաս տուժածների մայրեր:
Երեխաներից մեկի ընտանիքը կես տարվա թերապիայի համար ավելի քան 10 հազար դոլար էր վճարել: JONAH-ի անհատական խորհրդակցություններն արժեն 100 դոլար, իսկ խմբակայինները՝ 60, հանգստյան օրերին ծառայությունների մատուցման համար պահանջվում է 700 դոլար:
Հայցվորների նկարագրած իրադարձությունները վերաբերում են 2007-2009 թվականներին:
Նշենք, որ Ամերիկյան հոգեբանական ասոցացիան դեռևս 1973 թվականին է հոմոսեքսուալիզմը հանել շտկում պահանջող հոգեկան խանգարումների ցուցակից:
