Դամասկոսի քրիստոնեաբնակ Ջարամանա թաղամասում երկու մեքենաների պայթեցման հետևանքով զոհերի թիվը հասել է 54-ի, ավելի քան 120 մարդ վիրավորվել է: Այս մասին հաղորդում է France-Presse գործակալությունը՝ վկայակոչելով Լոնդոնում տեղակայված Մարդու իրավունքների պաշտպանության սիրիական կենտրոնի տվյալները:
Ավելի վաղ հաղորդվում էր 44 զոհերի մասին:
Սիրիայի ՆԳՆ ներկայացուցիչը հայտարարել է, որ ճանաչվել է 34 զոհերի ինքնությունը: Պայթյունի վայրերում հայտնաբերվել են առանց անձը հաստատող փաստաթղթերի ևս 10 մարդկանց մարմիններ:
Սիրիայի SANA պետական տեղեկատվական գործակալությունը տեղի ունեցածն անվանել է ահաբեկչական գործունեություն քաղաքի կենտրոնում:
«Քաղաքի կենտրոնական հրապարակում ահաբեկիչները պայթեցրել են երկու ականապատ մեքենա, որոնցում գտնվել է մեծ քանակությամբ պայթուցիկ»,- հաղորդում է SANA-ն:
Հիշեցնենք, Ջարամանա թաղամասում այսօր 4 պայթյուն է իրականացվել: Կենտրոնական հրապարակում պայթեցվել է երկու ականապատ ավտոմեքենա, երկու ինքնաշեն պայթուցիկ սարք էլ գործի են դրվել թաղամասի տարբեր փողոցներում:
