«Ֆորմուլա-1»-ի 2012թ. մրցաշրջանն իսկապես խելահեղ ստացվեց: Մինչև վերջին՝ Բրազիլիայի Գրան պրին չեմպիոնական պայքարը շարունակվում էր (ինչպես և Սան Պաոլոյի 2007թ. Գրան պրիում, որը գրվեց «Ֆորմուլա-1»-ի պատմության էջերում):
Մրցաշրջանն այնքան անկայուն էր (առաջին 7 Գրան պրիներում տարբեր ավտոարշավորդներ էին հաղթել), որ հիշեցնում էր 1982 թվականը, երբ Ռոսբերգը աշխարհի չեմպիոն դարձավ՝ իր ակտիվում ունենալով ընդամենը 1 հաղթական Գրան պրի: Չեմպիոնի անունը հայտնի էր դառնալու 306 կմ երկարություն ունեցող «Ինտերլագոս» անվանումը կրող վազքուղում: Մեկնարկային դրաման, եղանակային անբարենպաստ պայմանները, տակտիկական համարձակ քայլերը, Հյուլկենբերգի՝ առաջատարի դիրքում հայտնվելը և նրա ճակատագրական սխալը… Այս ամենը տեղի ունեցավ «Ֆորմուլա-1»-ի եզրափակիչ՝ Բրազիլիայի Գրան պրիում:
Հիանալի մեկնարկեցին Հեմիլթոնը, Մասան, Ֆետելը: Գերմանացին ամեն ինչ անում էր բախումներից խուսափելու համար, իսկ «Մաքլարեն»-ի ավտոարշավորդներ Լուիս Հեմիլթոնն ու Ջենսոն Բատոնն աստիճանաբար ամրապնդում էին առաջատարի դիրքը: Ֆերնանդո Ալոնսոն երկրորդ շրջանում կրկնակի շրջանցման արդյունքում հայտնվեց երրորդ տեղում, սակայն թույլ տված սխալի պատճառով կրկին վերադարձավ հինգերորդ տեղ: Ֆետելը երկրորդ շրջանն ավարտեց 6-րդ հորիզոնականում: Այնուհետև փոխվեցին եղանակային պայմանները: Հորդառատ անձրևի պատճառով մրցարշավի տնօրինությունը որոշեց վազքուղի դուրս բերել նաև անվտանգության մեքենա: Այդ ժամանակ Հյուլկենբերգն ու Բատոնը հսկայական առավելություն ունեին հակառակորդների նկատմամբ:
31-րդ շրջանում հիանալի գործեց Ֆելիպե Մասան՝ Ֆետելին ու Կոբայասիին շրջանցելուց հետո հայտնվելով 5-րդ տեղում: Հյուլկենբերգը, Հեմիլթոնը, Բատոնն ու Ալոնսոն կազմում էին առաջին քառյակը: 48-րդ շրջանում Հյուլկենբերգը սխալվեց շրջադարձ կատարելիս: Լուիս Հեմիլթոնն անմիջապես օգտվեց մրցակցի սայթաքումից ու հայտնվեց առաջին հորիզոնականում: 52-րդ շրջանում բոլիդի անվադողերը փոխեց Ֆետելը (տեղադրեց մեդիում), որից հետո հայտնվեց 10-րդ տեղում: Գերմանացին և նրա թիմը սխալվել էին, քանի որ շուտով նա կրկին փոխեց անվադողերը (տեղադրվեցին միջանկյալ անվադողեր): Լրացուցիչ փիթ-ստոպը նրանից 29 վայրկյան խլեց: Այդ ժամանակ խափանվել էր ռադիոկապը և գերմանացին ոչ մի կերպ չէր կարողանում հաղորդակցվել իր թիմի հետ: 55-րդ րոպեին Հյուլկենբերգը դիմեց հակահարձակման և փորձեց ետ բերել առաջին հորիզոնականը, սակայն բախվեց Հեմիլթոնի բոլիդին: Սթյուարդներն արձանագրեցին, որ Նիկոն մրցումից դուրս է թողել Լուիսին և Հյուլկենբերգի համար նշանակեցին փիթ-լեյն:
Պիլոտներն ընթանում էին հետևյալ դասավորվածությամբ՝ Բատոն, Մասա, Ալոնսո, Ուեբեր, Հյուլկենբերգ, Շումախեր, Ֆետել, Կոբայասի, Վերն, Դի Ռեստա: Մասան երկրորդ տեղը զիջեց Ալոնսոյին, սակայն դա իսպանացուն բավական չէր չեմպիոնի տիտղոսը նվաճելու համար, քանի որ Ֆետելը Շումախերին շրջանցելուց հետո ընթանում էր իրեն ձեռնտու 6-րդ տեղով: Բատոնը, Ալոնսոն ու Մասան բարձրացան պատվո հարթակին, իսկ Ֆետելն իր թիմակիցների հետ տոնում էր 3-րդ անընդմեջ չեմպիոնական տիտղոսը: Այսպիսով՝ Ադրիան Նյուիի պատրաստած բոլիդը կրկին անգերազանցելի էր: Չեմպիոնական անընդմեջ շարքով գերմանացուն գերազանցում են միայն Ֆանհիոն (4 տիտղոս) և Շումախերը (5 տիտղոս):
«Դժվար է բառերով նկարագրել կատարվածը: Շատ ծանր մրցաշրջան էր, իսկ եզրափակիչ մրցումը համապատասխան վերջաբան էր: Բրազիլիայի Գրան պրին ամենադժվարն էր իմ մարզական կարիերայում: Ուրախ եմ, որ նման պայքարի արդյունքում դարձա աշխարհի չեմպիոն»,- հայտարարել է Ֆետելը:
«Ցանկանում եմ նշել, որ հպարտանում եմ իմ թիմով: Մենք ֆանտաստիկ մրցաշրջան ենք անցկացրել: Որոշ մրցումներում մեր բախտը չբերեց, որը ճակատագրական եղավ չեմպիոնի կոչման համար պայքարում, բայց բոլորս անում էինք հնարավորը՝ բարձունքին հասնելու համար: Տեսնենք` ինչ արդյունքի կարող ենք հասնել հաջորդ մրցաշրջանում, որի մեկնարկը սարերի ետևում չէ: Այս մրցաշրջանը ստացված եմ համարում, քանի որ առանց իդեալական բոլիդի կարողացանք պայքարել չեմպիոնի կոչման համար»,- նշեց Ալոնսոն:
«Հիանալի մրցում էր: Ես երբեք չեմ հանձնվում և պայքարում եմ մինչև վերջ: Հետաքրքիրն այն է, որ իմ վերջին մրցման արդյունքում 7-րդ տեղում էի: Նույն արդյունքը գրանցվեց նաև իմ առաջին ավտոարշավում՝ 308 Գրան պրիից առաջ: Շնորհավորում եմ Ֆետելին չեմպիոնական երրորդ տիտղոսի կապակցությամբ: Ես հպարտանում եմ նրանով: Չնայած, որ մրցումը եղանակային անբարենպաստ պայմաններում էր ընթանում, մեծ բավականություն ստացա Գրան պրիին իմ վերջին մասնակցությունից: Ցանկանում եմ ևս մեկ անգամ շնորհալակություն հայտնել թիմակիցներիս ու երկրպագուներիս՝ այս տարիների ընթացքում ցույց տված աջակցության համար»,- հայտարարեց Շումախերը, որն իր առաջին չեմպիոնական տիտղոսը նվաճեց 25 տարեկանում (Ֆետելն այդ հասակում արդեն աշխարհի եռակի չեմպիոն է):
Այսպիսով՝ Ֆետելը դարձավ «Ֆորմուլա-1»-ի պատմության մեջ ամենաերիտասարդ աշխարհի եռակի չեմպիոնը (25 տարեկան, 4 ամսական և 22 օրական):
