Ռուսաստանը հիասթափված է Եվրասիականի հարցում Հայաստանի տատանումներից: «Առաջին լրատվական»-ի հետ զրույցում այս մասին ասաց «Միջազգային եվրասիական շարժման» լիդեր, իր ազգայնական հայացքներով հայտնի ռուս քաղաքագետ, հայ-ռուսական «Գրիբոյեդով» ակումբի անդամ Ալեքսանդր Դուգինը՝ անդրադառնալով Հարավային Ամերիկայում ՀՀ նախագահ Սերժ Սարգսյանի տված հարցազրույցին և դիտարկումներին, թե ցավալի է, որ Ռուսաստանը զենք է վաճառում Ադրբեջանին:
Նա նշեց, որ Ռուսաստանն աջակցում է Հայաստանին, բայց այդ աջակցությունը բացարձակ ու բացառիկ չէ՝ ուղղված չէ Ադրբեջանի դեմ: Հարցն այն է, ըստ նրա, որ Ռուսաստանը փոխհարաբերվում է Հայաստանի և Ադրբեջանի հետ տարբեր մակարդակներով, տարբեր ձևաչափերում, և ռուս քաղաքագետը հորդորում է չդրամատիզացնել իրավիճակը և Ռուսաստանի քաղաքականությունը: Մյուս կողմից, որքան մեծ ուշադրություն Երևանը սկսի դարձնել եվրասիական ուղղությանը, Դուգինի խոսքերով, որքան արագ ինտեգրվի Եվրասիական միությանը, այնքան ավելի շատ երաշխիքներ կլինեն Հայաստան-Ռուսաստան հարաբերությունների ամրապնդման համար: Նրա համոզմամբ՝ Երևանից է շատ բան կախված։ Ա. Դուգինը ենթադրում է, որ Հայաստանը կմիանա Եվրասիական տնտեսական միությանը մինչև աշուն։ Դա ծրագրված էր մինչև հուլիս, բայց նա կարծում է, որ Ռուսաստանը փոքր-ինչ հիասթափված է Հայաստանի տատանումներից ու կասկածներից: Հայաստանը որոշակի պայմաններ է դնում Ռուսաստանի առջև, որոնք սկզբունքորեն կարելի էր նաև չդնել: Նա նաև չի կարծում, թե Ռուսաստանն է կորցրել իր հետաքրքրությունը Հայաստանի անդամակցության նկատմամբ:
«Ավելի հավանական է, որ Հայաստանի անդամակցության հարցը, իմ տեղեկություններով, Երևանի պատճառով է ձգձգվում: Բայց ես դետալներին չեմ տիրապետում, թե ինչ հարցեր են խոչընդոտում Հայաստանի անդամակցությանը, և ինչ պայմաններ է դնում Հայաստանը: Բայց, իմ կարծիքով, խոսքը Եվրասիականի հարցում Երևանի տատանման մասին է, որն էլ հարուցում է Ռուսաստանի պատասխան քայլերը, ուստի, որքան ինձ է հայտնի, սա է հարցը»,- ասաց Դուգինը: Նա նշեց, որ ուկրաինական ճգնաժամը չի խոչընդոտում, որ Եվրասիական տնտեսական միության ձևավորումն իր ավարտին հասնի: Մասնավորապես նա ասաց, որ երբ Ռուսաստանը ետ վերադարձնի Նովոռոսսիան և ինտեգրի այն Եվրասիական տնտեսական միությանը՝ ամեն ինչ իր տեղը կընկնի:
«Հիմա Նովոռոսսիան չափազանց դրամատիկ մի իրավիճակում է, հակադրության մեջ է կիևյան նեոնացիզմի հետ, և խոսքն այն մասին է, որ Նովոռոսսիան կազատագրվի ու կմիանա եվրասիական պրոյեկտներին, բայց չեմ բացառում, որ այս փուլն ավելի երկար ձգվի: Ողջ Ուկրաինան այլևս չի լինի ԵՏՄ-ում, քանի որ ամբողջական Ուկրաինա այլևս գոյություն չունի, Ուկրաինայի մի մասը կմիանա ԵՏՄ-ին, իսկ մյուս հատվածը կմիանա ԵՄ-ին էլի շատ տարիներ հետո»,- ասաց նա: