Այս պահին հարյուրավոր նաիրիտցիներ կառավարության շենքի մոտ զրուցում են ՀՀ վարչապետ Հովիկ Աբրահամյանի հետ: Գործարանի արհմիության ղեկավար Հրաչ Թադևոսյանը հայտարարեց, որ նաիրիտցիների վերջին հույսն ու հավատը վարչապետն ու նախագահն են, կոլեկտիվը հավատում է նրանց ողջամտությանը:
Գործարանի աշխատակիցների հետ խոսեց նաև էներգետիկայի և բնական պաշարների նախարար Երվանդ Զախարյանը՝ ասելով, թե ուսումնասիրություններ են կատարում, կազմվել է հանձնաժողով, և մինչև սեպտեմբերի կեսերը պարզ կլինի «Նաիրիտ»-ի ճակատագիրը:
Աշխատակիցներից մեկը նշեց, որ պահանջում են հենց հիմա լուծել այդ հարցը, քանի որ արդեն 15 ամիս է՝ իրենք սպասում են: Վարչապետն էլ ասաց. «Տենց եք անում, որ գործերը առաջ չեն գնում»:
Այս պահին նաիրիտցիները շարունակում են վարչապետի հետ զրուցել: Հրաչ Թադևոսյանը պահանջեց կազմել 15-20 հոգանոց խումբ, ովքեր կառավարության նիստից առաջ կամ հետո վարչապետի հետ առանձին կզրուցեն: Այս պահին լարվածություն է նկատվում կառավարության մոտ: Նաիրիտցիները ցուցապաստառներով են՝ ««Նաիրիտը» երկրի տնտեսության զարգացման երաշխիքն է», «Պահանջում ենք վերագործարկել «Նաիրիտը»», «Աշխատավարձերի, պարտքերի մարում», «Հավատում ենք երկրի ղեկավարների ողջամտությանը»:
Նաիրիտցիները աղմկում են, սուլում, շրջապատել են վարչապետին: «Մեզ ժամանակ է պետք մեղավորներին պատժելու համար, առաջարկում եմ համբերություն»,- ասաց վարչապետը:
Լուսանկարը` PAN Photo-ի
