Այսօր լրագրողների հետ հանդիպման ժամանակ «Նոր ժամանակներ» կուսակցության նախագահ Արամ Կարապետյանը և ԼՂ նախկին արտգործնախարար Արման Մելիքյանը խոսեցին Մինսկի խմբի համանախագահների տարածաշրջան կատարած այցից:
Ըստ Արամ Կարապետյանի՝ ԵԱՀԿ Մինսկի խումբը տարածաշրջան էր եկել ասելու, որ չի մեռել, որ ինքը կա: Նրա խոսքով՝ ինչ-որ գործընթաց է փորձում առաջ տանել: «Հիմնական խնդիրները գալու են հունվարից հետո, երբ քննարկման խնդիրներն ավելի առարկայական կդառնան: Հունվար ամսին տարածաշրջանային գործընթացները կարող են այնքան արագանալ, որ Հայաստանում առաջիկա նախագահական ընտրությունները նշանակություն չունենան»,- նկատեց Արամ Կարապետյանը:
Համատեղ ասուլիսի ընթացքում ԼՂ նախկին արտգործնախարար Արման Մելիքյանն Արամ Կարապետյանի այս միտքը, որպես տարբերակ, ընդունեց՝ հավելելով, որ առաջիկա մի քանի ամիսների ընթացքում, չի կարծում, թե որևէ երկիր կցանկանա Մերձավորարևելյան գործընթացներում կանխարգելիչ քայլեր կատարել: Նրա խոսքով՝ այսօր շատ է խոսվում կողմերին ուժային լուծում պարտադրելու շուրջ, այն խաղաղությունը, որը միջազգային հանրությունը կցանկանա պարտադրել:
«Դեռևս մեծ է անորոշությունը ՌԴ-ի ներքին իրավիճակի հետ կապված, հետևաբար՝ նաև արտաքին ոլորտում, որոշակի ճշգրտումներ ունեն անելու ԵՄ-ն և ԱՄՆ-ը: Ուստի այս փուլում իրավիճակի փոփոխություն չի լինի»,- տեսակետ հայտնեց Արման Մելիքյանը:
Խոսելով Մինսկի խմբի՝ տարածաշրջան կատարած այցից՝ նա ասաց, որ արձանագրվեց՝ բանակցային գործընթացը շարունակվելու է արտգործնախարարների մակարդակով:
