«Հայաստանում ձևավորվել է միահեծան, առանց իրական հակակշիռների միակուսակցական իշխանական համակարգ: Իրական կոալիցիայի բացակայությունը բացառում է լայն հասարակական համախմբումը իշխանության շուրջ, ինչը հակասում է ժողովրդավարական երկրներում գործող կառավարման սկզբունքներին, մեծացնում է կոռուպցիան, անպատասխանատվությունը և ամենաթողությունը»,- այսօր լրագրողների հետ հանդիպման ժամանակ հայտարարեց ՕԵԿ առաջնորդ Արթուր Բաղդասարյանը:
Նա նշեց, որ շուրջ 3 ամիս առաջ դուրս գալով կոալիցիայից՝ ՕԵԿ-ը բազմաթիվ հանդիպումներ է ունեցել, քննարկումներ է կազմակերպել և հիմնականում 5 քաղաքական եզրահանգման է եկել, որոնք էլ դառնալու են կուսակցության քաղաքական օրակարգի հիմնական առաջնահերթությունները: Բացի վերը նշվածից՝ Բաղդասարյանը թվարկեց մյուս եզրահանգումները՝ տնտեսական, սոցիալական, իրավական և արտաքին քաղաքական ճակատում Հայաստանի վարած քաղաքականությունը, որում տեսանելի են մտահոգիչ զարգացումներ: «Հասարակությունը պետք է տեսնի, որ երկրում ձևավորված է կանխատեսելի քաղաքական, տնտեսական, սոցիալական քաղաքականություն, որպեսզի կարողանա ծրագրել իր ապագան մեր երկրում: Բայց, ցավոք, հասարակությունը չի տեսնում այն գործիքները, մեխանիզմները, մեթոդները, որոնց կիրառման դեպքում իր կյանքում ինչ-որ բան կփոխվի դեպի լավը»,- ասաց Ա. Բաղդասարյանը:
Նա, թվարկելով կատարված եզրահանգումները, առաջարկեց նաև ելքեր, որոնք են՝ քաղաքական դաշտի արդիականացումը, 100 տոկոս համամասնական ընտրակարգին անցում կատարելը, որը, Բաղդասարյանի խոսքով, Հայաստանի քաղաքական համակարգի համար գերակա նշանակություն ունի: Բիզնեսին ազատություն տալը, իրավական արդարության սահմանելը:
Այս ամենին ՕԵԿ-ը պատրաստվում է հասնել ակտիվ օրենսդրական նախաձեռնությունների, նշված կետերը քաղաքական դաշտի հիմնական խաղացողների հետ քննարկելով և ակտիվ հանրահավաքների, երթերի ու քննարկումների միջոցով:
«ՕԵԿ-ն իր քաղաքական գործունության մեջ լինելու է համառ, հետևողական և պատասխանատու»,- հայտարարեց Արթուր Բաղդասարյանը:
