«Հանդից ենք եկել, հանկարծ չնկարես, քաղաքում շատ մտիկ կանեն, ամոթ ա»,- մեզ հետ զրույցում նշեցին սահմանային Վերին Կարմիրաղբյուրի կանայք, ովքեր եկել էին հանդիպելու իրենց գյուղ այցելած վարչապետ Հովիկ Աբրահամյանին: Հանդիպումը հուսադրել է նրանց, բայց կրակոցները հուսադրող չեն, սահմանին լարվածություն են նկատում: Կանայք Վերին Կարմիրաղբյուրում վախենում են կրակոցներից:
«Որ մեր համար չենք էլ վախում, երեխաների համար շատ ենք վախում: Երեխեքը վիպուսկնոյից հետո դուրս են եկել արևածագ գնան, կրակել են վրեքները, կլինի՞ տենց: Եկեղեցու վրա կրակել են, դպրոցի վրա կրակել են նույն պահին, ո՞նց կարա երեխեն չվախենա»,- ասաց գյուղի կենսաբանության ուսուցչուհի Արմինե Ավագյանը:
Գյուղի փոքրիկ Մամիկոնին տանը ասում են՝ քնի, ասում է՝ ինչի՞, կրակում են, մա՛մ: Մամիկոնն այլևս կրակոցներից չի վախենում:
Ուսուցչուհին պատմեց, որ այս տարի Վերին Կարմիրաղբյուրում 21 հոգի է ավարտել դպրոցը, ընդամենը յոթ աշակերտ այս տարի կգնա առաջին դասարան:
Արմինե Ավագյանը կենսաբանություն է դասավանդում, նկատում է, որ երեխաները շատ անհետաքրքիր են դարձել, այնքան են առօրյա հոգսերով ծանրաբեռնվել, որ ուսումն էլ են մի կողմ դրել:
Գյուղացիները պատմեցին, որ հիմա արտագաղթը շատ է թե՛ Մովսես գյուղում, թե՛ իրենց գյուղում: Նախկինի պես միայն ամուսինները չեն գնում, այլ գնում են ընտանիքներով:
Ամբողջությամբ՝ տեսանյութում:
