Ադրբեջանական Trend լրատվական գործակալության փոխանցմամբ՝ ԵՄ գերագույն հանձնակատար Քեթրին Էշթոնը, ով Կենտրոնական Ասիա մեկնելուց առաջ 3 ժամով իջևանել է Վրաստանում, հանդիպել է Վրաստանի նախագահ Միխեիլ Սաակաշվիլիի հետ:
Վրաստանի նախագահի մամլո ծառայության հաղորդմամբ՝ հանդիպման արդյունքներով Քեթրին Էշթոնը հայտարարել է, որ անհրաժեշտ է պահպանել իրավունքի ու օրենքի գերակայության սկզբունքները: Էշթոնն իր գոհունակությունն է հայտնել Վրաստանում ժողովրդավար ձևով խորհրդարանական ընտրությունների անցկացման ու իշխանության հանգիստ փոխանցման կապակցությամբ:
Դրա հետ մեկտեղ Էշթոնն ընդգծել է, որ ԵՄ-ն հատուկ ուշադրություն է հատկացնում նախագահ Միխեիլ Սաակաշվիլիի և վարչապետ Բիձինա Իվանիշվիլիի միջև կառուցողական համագործակցության խնդրին: Սաակաշվիլին ու Էշթոնը քննարկել են նաև Վրաստանի ու ԵՄ-ի փոխհարաբերություններին առնչվող հարցերը:
Էշթոնը հույս է հայտնել, որ փոփոխության չի ենթարկվի Վրաստանի արտաքին քաղաքականության ուղղվածությունը, և որ կշարունակվի եվրակառույցներին Վրաստանի ինտեգրման գործընթացը: Էշթոնի խոսքերով՝ պետք է իրենց տրամաբանական ավարտին հասցվեն համապարփակ ազատ առևտրի, ընկերակցության համաձայնագրի կնքման շուրջ տարվող բանակցությունները:
Կողմերը քննարկել են նաև Վրաստանի անվտանգության ապահովման հարցը և այդ շրջանակներում ԵՄ դիտորդական առաքելության հարցը:
