Պոլսո հայոց պատրիարքի փոխանորդ Արամ արքեպիսկոպոս Աթեշյանը դատական հայց է ներկայացրել Քեմալ Թայֆուն Նարջինի դեմ և ակնկալում է արդար դատավարություն Թուրքիայի իրավապահներից: Ի՞նչ է տեղի ունեցել մեկ տարի առաջ:
«Առաջին լրատվական»-ին պատրիարքի փոխանորդը պատմեց, որ մեկ տարի առաջ կառավարությունից Քեմալ Թայֆուն անունով մեկը եկել է պատրիարքարան, խոստացել կարգավորել «Սանասարյան Հան» շենքը Պոլսո Հայոց պատրիարքարանին վերադարձնելու գործը: Շենքը հայ համայնքին է վերադարձվում Թուրքիայում ազգային փոքրամասնություններից առգրավված գույքերը վերադարձնելու ծրագրի շրջանակում:
Այս գործն անցյալ տարի է եղել: «Անցյալ տարվանից նոր է բացահայտվում, քանի որ ես բողոք էի ներկայացրել, բայց կասկածյալ չկար, բայց հիմա վկաներ կան, այդ մարդը կեղծարարի, գողի, ավազակի մեկն էր: Ինձնից վեց հազար լիրա վերցրին, հանցանքը հայտնի է,վկաներով փաստվեց դա, տեսնենք թե հաջորդ նիստին ինչ պատիժ կսահմանեն նրան»,-ասաց նա՝ հավելելով, որ հաջորդ դատական նիստը մի քանի ամիս հետո կլինի:
Հարցին՝ հավատո՞ւմ եք արդյոք, որ թուրքական դատարանը կարող է անաչառ վճիռ կայացնել, Արամ արքեպիսկոպոս Աթեշյանը նշեց, որ սա միայն իր հարցը չէ, սա նաև Անկարայի կառավարությանն է, որովհետև կեղծարարը եկել էր իբր վարչապետի կողմից և տարբեր նյութերով խաբել. «Հետևաբար, ես Անկարա լուր եմ տվել, որ ձեր անունով ինձ մոտ եկել են, հետևաբար, Անկարան է, որ ավելի շատ պատիժ պետք է պահանջի: Շատ վարպետ կեղծարար է, կեղծ թղթեր է պատրաստում, այդքան հմտացած է, որ վարչապետարանի թուղթ էր պատրաստել և ինձ բերել: Այս ամենը լավ իմացող մեկն է: Այս հոդվածով նրան 2-7 տարի պատիժ կպահանջվի: Հարցը երեք հազար դոլարը կամ վեց հազար թրքականը չէ, այլ կարևորը նրա՝ պատիժը կրելն է»,- հավալեց նա:
Նա նշեց, որ շենքի հարցն անորոշ է, դատական գործընթացը շենքի հետ կապված երեկ մերժվել է, բայց իրենք պետք է շարունակեն պայքարը։ «Ավելի բարձր դատարաններ պետք է դիմենք»,- հավելեց նա:
Արդյոք օգոստոսին ընտրություններից հետո հնարավո՞ր է՝ այս առումով իրավիճակ փոխվի, Արամ արքեպիսիկոպոս Աթշյանը նշեց, որ հիմա վաղ է ասել, թող ընտրությունները տեղի ունենան, հետո կտեսնենք:
Այնուամենայնիվ, նա նշեց, որ Պոլսո հայոց պատրիարքության և թուրքական կառավարության միջև թեև լավ հարաբերություններ են, սակայն մի շարք դատական գործեր են շարունակվում.
«Պահանջներ շատ ունենք, և շատերն էլ դատարանում պետք է լուծվեն՝ լինեն կալվածային, թե շենքային, թե կեղծարարության , ամենը տեղ ունեն»: