Հոկտեմբերի 25-ին Խանջյան փողոցի 20 շենքի մոտակայքում տեղի ունեցած փլուզման առիթով քրեական գործ էր հարուցվել: Ինչպես «Առաջին լրատվական»-ի հետ զրույցում տեղեկացրին ՀՀ ոստիկանության հասարակայնության հետ կապի և լրատվության բաժնից, նախաքննությունը շարունակվում է, քննչական գործողություններ են տեղի ունենում: Ըստ ՀՀ ոստիկանության հասարակայնության հետ կապի և լրատվության բաժնի աշխատակցի՝ փլուզման փորձաքննության պատասխանը դեռևս չկա:
Նշենք, որ գործը հարուցվել է ՀՀ Քր. օր.-ի 157-րդ հոդվածի հատկանիշներով (Աշխատանքի պաշտպանության կանոնները խախտելը): Եթե մարդու առողջությանն անզգուշությամբ պատճառվել է ծանր կամ միջին ծանրության վնաս կամ մասնագիտական հիվանդություն, այս հոդվածով սահմանվում է նվազագույն աշխատավարձի 200-ապատիկից 400-ապատիկի չափով տուգանք կամ ուղղիչ աշխատանք՝ առավելագույնը երկու տարի ժամկետով, կամ ազատազրկում՝ առավելագույնը երկու տարի ժամկետով: Նույն արարքը, որն անզգուշությամբ առաջացրել է տուժողի մահ, պատժվում է ազատազրկմամբ՝ առավելագույնը հինգ տարի ժամկետով՝ որոշակի պաշտոններ զբաղեցնելու կամ որոշակի գործունեությամբ զբաղվելու իրավունքից զրկելով՝ առավելագույնը երեք տարի ժամկետով կամ առանց դրա:
Հիշեցնենք, որ փլուզման հետևանքով վիրավորվել էին 10-ից ավելի շինարարներ:
