«Բասմաչ» մականունով Ալեքսանդր Մաթուսովը, որը Շչելկովյան կազմակերպված հանցավոր խմբավորման ենթադրյալ ղեկավարն է, Թաիլանդի օդանավակայանում պառկել է հատակին ու հայտարարել, թե ոչ մի տեղ չի գնա, այդուհանդերձ՝ նրան նստեցրել են ինքնաթիռ, և նա Ինտերպոլի ռուսական ազգային բյուրոյի աշխատակիցների ուղեկցությամբ ուղևորվել է Ռուսաստան:
Այս մասին RIA Novosti-ին հայտնել է Բանգկոկում ՌԴ փոխհյուպատոս Ալեքսեյ Ֆալունինը:
Մաթուսովը ձերբակալվել էր Թաիլանդում՝ վարտիքով մոտոցիկլետ վարելիս: Նա կեղծ փաստաթղթերով բնակվել է Բանգ Սարե ավանում՝ Պատայայից 15 կմ հեռավորության վրա:
Ստուգման ժամանակ պարզվել է, որ Մաթուսովի նկատմամբ հայտարարված է միջազգային հետախուզում՝ 3 սպանությունների գործով, որն իրականացրել է Շչելկովյան կազմակերպված հանցավոր խմբավորումը: Նա արդարադատությունից խուսափել է 2009-ից:
Ինքնաթիռը, որով Ռուսաստան է վերադարձվել Մաթուսովը, Բանգկոկից դուրս է եկել Երևանի ժամանակով ժ. 06.30-ին:
Թռիչքից առաջ Մաթուսովը պառկել է հատակին ու հայտարարել, թե ոչ մի տեղ չի գնա ու կսպասի իր տեղացի փաստաբանին, որը կկասեցնի արտաքսումը, սակայն վերջինս այդպես էլ չի հայտնվել օդանավակայանում:
