Մարտի 17-ին Մադրիդի կենտրոնում տեղակայված խոշորագույն «Գրքի տուն» գրախանութի հանդիսությունների սրահում տեղի ունեցավ Իսպանիայում Հայաստանի Հանրապետության դեսպանության և Մարկո Պոլոյի անունը կրող հեղինակավոր տուրիստական գործակալության (Club Marco Polo) կողմից կազմակերպված շնորհանդեսը` նվիրված Հայաստանին:
Բանախոսն էր գործակալության կոմերցիոն տնօրեն Խոսե Լուիս Անգուլոն, որը վերջերս Հայաստան այցելելուց հետո իր տպավորությունները կիսեց դահլիճում հավաքված գործընկերների և հանրության առջև` ներկայացնելով հայերին որպես «իրապես դեպի եվրոպական ընտանիք ձգտող մի փոքրիկ, բայց փառապանծ ազգ, որը դարեր շարունակ եղել է եվրոպական քաղաքակրթության փարոսն ու տարածողը Արևելքում»:
Հանդեսի ընթացքում հնչում էին հայկական ազգային մեղեդիներ: Եզրափակիչ խոսքով հանդես եկավ Իսպանիայում ՀՀ գործերի հավատարմատար Խորեն Տերտերյանը: