Հանրային ծառայությունները կարգավորող հանձնաժողովի նիստում էլեկտրաէներգիայի սակագնի բարձրացման հարցի քննարկումը ուղեկցվում էր մի քանի քաղաքացիական նախաձեռնությունների համատեղ բողոքի ակցիայով:
Ակտիվիստները ամեն կերպ փորձում էին ներկա գտնվել հանձնաժողովի նիստին, սակայն նրանց պարզաբանվում էր, որ դահլիճում տեղ չկա: Չկարողանալով ներս մտնել՝ ակցիայի մասնակիցները դիմեցին ծայրահեղ քայլերի և փակեցին Սարյան փողոցը՝ նստելով ճանապարհի երթևեկելի մասում:
Ոստիկանությունը, սակայն, ներգրավելով լրացուցիչ միջոցներ, բերելով կարմիր բերետավորներին՝ քարշ տալով, հրելով, հարվածելով հեռացրեց ակցիայի մասնակիցներին փողոցից: Վերջիններս ճանապարհի քիչ ավելի վերևից՝ հետիոտնի համար նախատեսված հատվածից, նորից փակեցին ճանապարհը, սակայն արժանացան նույն պատասխան բռնություններին: Ոստիկանները ոտքերից ու ձեռքերից քարշ տալով փորձեցին բերման ենթարկել Դավիթ Սանասարյանին, սակայն փոխոստիկանապետ Վալերի Օսիպյանի հրահանգով նրան բաց թողեցին:
Նշենք, որ այսօրվա ակցիայի ժամանակ ակտիվիստները մի քանի թևի էին բաժանվել: Մի մասը պայքարում էր հանձնաժողովի նիստին ներկա գտնվելու համար, մյուս մասը դա համարում էր ավելորդ ժամանակի վատնում, երրորդ մասն էլ ճանապարհն էր փակում, ինչի պատճառով էլ այսօրվա ակցիան որևէ արդյունք չգրանցեց:
Նրանք պայմանավորվեցին հանդիպել վաղը՝ ժամը 19-ին, Մաշտոցի պուրակում, որպեսզի քննարկեն իրենց հետագա անելիքները:
Առավել մանրամասն՝ տեսանյութում: