Այսօր լրագրողների հետ հանդիպմանը ԲՀԿ խմբակցության պատգամավոր Լյովա Խաչատրյանն ասաց. «Գագիկ Ծառուկյանը որոշումը չի կայացրել ու գրպանը դրել»: Ըստ բանախոսի` Գագիկ Ծառուկյանը նախագահական ընտրությունների վերաբերյալ հայտարարություն կանի այն ժամանակ, երբ ԲՀԿ քաղխորհուրդը նիստ կանցկացնի և որոշում կընդունի. «Գագիկ Ծառուկյանը կոմունիստական գաղափարների մարդ չէ, որ իր որոշման մասին հայտարարելը կապի ծննդյան տոնի հետ և այլն: Դեռ նախագահական ընտրությունների օրը հայտնի չէ, պաշտոնական հրաման չկա, և շտապելու պատճառ չկա»:
Անդրադառնալով ՀԱԿ խմբակցության կողմից Ընտրական օրենսգրքում փոփոխություն կատարելու համար ԱԺ արտահերթ նիստ անցկացնելու պահանջին` Լ. Խաչատրյանը նշեց, որ բացարձակապես անընդունելի էր հանրապետական պատգամավորների բացակայությունը. «Մարդիկ կարող էին գալ, քննարկումներ անցկացնեինք, և նոր դեմ քվեարկեին: Նույնիսկ նիստը վարողը` Էդուարդ Շարմազանովը, չէր գրանցվել: Սա անհեթեթ բան է: Հանրապետականները պարզապես հերթական անգամ իրենց մուսկուլները ցույց տվեցին»,- նշեց բանախոսը:
ԲՀԿ-ական պատգամավորը նշեց նաև` եթե չլիներ նախորդ ընտրությունների փորձը, միգուցե նման նիստ անցկացնելու կարիք չլիներ. «Մենք ի՞նչ իմանայինք, որ խորհրդարանական ընտրությունների ժամանակ մեկ բնակարանում հարյուրից ավելի մարդ է գրանցված լինելու: Հետո հասկացանք, թե ինչ լայնամասշտաբ խախտումներ են լինում: Այդ իսկ պատճառով նման նիստն անցկացնելն ուղղակի անհրաժեշտություն էր, որպեսզի նման բաներ այլևս չկրկնվեին»,- եզրափակեց Լյովա Խաչատրյանը:
