Հրապարակախոս, թատերագետ Արա Նեդոլյանն «Առաջին լրատվական»-ի հետ զրույցում, անդրադառնալով «Հայաստան» համահայկական հիմնադրամի ամենամյա մարաթոնին, նախ նշեց, որ նորմալ է այն, որ տարեցտարի մարաթոնին մասնակցող սփյուռքահայերի թիվը պակասում է, ապա նրանց խորհուրդ տվեց ոչ մի դեպքում գումար չտալ.
«Նորմալ է, այդպես էլ պետք է լինի: Ես խորհուրդ եմ տալիս աշխարհի տարբեր երկրներում ապրող հայերին ոչ մի դեպքում չմասնակցել մարաթոնին և գումար չտալ: Հայաստանում ենթադրվում էր, որ 20 տարվա ընթացքում պետք է ստեղծվեր նորմալ տնտեսական համակարգ: Եվ քանի որ մենք տեսնում ենք, որ չար կամքի՝ իշխող ուժերի պատճառով, նման համակարգը թերի է (իսկ մենք դա համարում ենք քրեաօլիգարխիկ համակարգ), ուրեմն այն, որ ինչ-որ տեղ մեր երկրում չի հերիքում փողը, դա միայն և միայն նրանց մեղքն է:
«Ազգային տուրքի» գաղափարը շատ հետադիմական գաղափար է, մենք վաղուց ստեղծել ենք պետականություն: Ազգային տուրքի գաղափարը միջնադարյան բառապաշարից է, որի մասին խոսք լինել չի կարող: Հրեաները մինչև Իսրայել ստեղծելն ունեին ազգային տուրք, հայերը մինչև Հայաստանի Հանրապետություն հռչակելն ունեին կամ պետք է ունենային ազգային տուրք: Անիմաստ է խոսել այդ մասին այն դեպքում, երբ պետականությունը կա:
Հարցին, թե ինչու օլիգարխները երբևիցե հիմնադրամին չեն օգնում, հրապարակախոսը պատասխանեց. «Օլիգարխը քանի որ իր ազգում է գող և գիտի, որ գող է՝ չի համարում, որ ինքն արժանի է և իրավունք ունի բարեգործություն անել: Ինչ–որ տեղ ճիշտ էլ անում է: Նա իրավունք չունի գողանալ և այդ փողով բարեգործություն անել»,- եզրափակեց Ա. Նեդոլյանը:
Հիշեցնենք, որ «Հայաստան» համահայկական հիմնադրամի հեռուստամարաթոնը կանցկացվի այսօր՝ երեկոյան ժամը 20.00-ից սկսած:
