Արդարադատության ոլորտը մշտապես գտնվել է ուշադրության կենտրոնում, պարզապես այժմ քաղաքական տարբեր ճամբարներում գտնվող մարդիկ փորձում են ամենախոցելի և զգայուն համակարգի այդ խոցելիությունից դիվիդենտներ շահել։ Այս մասին ասել է արդարադատության նախարար Հրայր Թովմասյանը՝ Հանրային հեռուստաընկերության «Հարցազրույց» հաղորդման եթերում:
Խոսելով համակարգի խնդիրներից՝ նախարարը կարևոր է համարել ՔԿՀ-ների բեռնաթափումը: «Երկու շաբաթ առաջ կառվարությունը 500 միլիոն հատկացրեց «Արմավիր» ՔԿՀ–ի կառուցմանը: Միայն ՔԿՀ-ների կառուցմամբ, սակայն, բեռնաթափման խնդիր չեն լուծում»,- ասել է նախարարը՝ չժխտելով, որ կան բանտախցեր, որոնցում նախատեսվածից շատ կալանավորներ են պահվում. Ասենք՝ 9 հոգու համար նախատեսվածում՝ 15-ից ավելի, սակայն այդպիսի դեպքերը, ըստ նրա, և՛ քիչ են, և՛ նշված ՔԿՀ-ի կառուցմամբ կհաղթահարվեն: «Ունենք 5 հազարից ավելի բանտարկյալ և եթե այդ 300 հարյուր տեղն ավելացնենք մեր ունեցածին, խնդիրը լուծվում է: Միջին հաշվով յուրաքանչյուր ՔԿՀ-ում 300-400 անձ ունենք: Պետք է գնանք ՔԿՀ-ների խոշորացմանը և հավանաբար Աբովյանում կկառուցենք խոշոր՝ 2000 տեղանոց քրեակատարողական հիմնարկ»,- ասել է նախարարը՝ հավելելով, որ խոշորացման պարագայում ֆինանսական ռեսուրսները կուղղվեն դատապարտյալների կենցաղի բարելավմանը: Միայն ՔԿՀ-ների ավելացմամբ, սակայն, խնդիրը լուծելը նախարարը ճիշտ չի համարում: Ըստ նրա՝ վաղաժամկետ ազատ արձակման մեխանիզմը ևս կարևոր է. կան բանտարկյալներ, որոնք ազատության մեջ վնաս հասցնել չեն կարող:
Հայաստանում այսօր կան 104 ցմահ բանտարկվածեր, որը գերազանցում է միջին եվրոպական ցուցանիշներին: Հրայր Թովմասյանը նման մեծ թիվը պայմանավորում է նրանով, որ նորանկախ Հայաստանի պատմության մեջ երբեք մահապատիժ չի կիրառվել, դրան փոխարինել է ցմահ դատապարտումը:
Արդարադատության նախարարը կարևոր և այս պահին՝ անլուծելի խնդիր է համարում բժիշկներով, այն էլ՝ որակյալ բժիշկներով ՔԿՀ-ների համալրումը. «Այս խնդիրը Վանաձորում չենք կարողանում լուծել: Եթե լուծում ենք էլ, ապա՝ կարճաժամկետ»:
Բանտախցերում ստուգումների արդյունքում 2607 կտրող-ծակող գործիք է հայտնաբերվել: Սրա վերաբերյալ նախարարն ասել է. «Կարող ենք թանգարան բացել և ցույց տալ, թե ինչից է հնարավոր սարքել. ամեն ինչից են սարքում, տեղում են պատրաստում, չի բացառվում, որ փոխանցվում են: Անազատության մեջ գտնվող մարդու միտքը շատ հնարամիտ է դառնում, և ամբողջ օրը մտածում է, թե ինչպես է հնարավոր դա անել»: Նախարարի խոսքերով՝ մեկ խուց ստուգելու համար 2-2,5 ժամ է հարկավոր, պետք է ստուգել առաջին հերթին արտաքին պատերը: Միայն այս տարվա ընթացքում 3 փախուստի դեպք է կանխվել, ընդ որում, մեկը՝ ցմահ բանտարկվածի։
Անդրադառնալով Հրայր Թովմասյանի այն հայտարարության շուրջ աղմուկին, թե՝ բերան կարելը բանտարկյալի համար սովորական բան է, նախարարը պատասխանել է. «Այն, որ լրագրողը կարող է նախարարի խոսքի միջից մի մասն առանձնացնել և փորձել սենսացիա սարքել, դա ցավալի է, բայց լրագրողը դա կարող է անել: Բայց երբ անում է կուսակցության ներկայացուցիչը, հանձնաժողովի նախագահը՝ այլ է: Դրանից հետո եղել են մի քանի պարզաբանումներ իմ կողմից: Երբ խսել եմ երևույթի մասին, խոսել եմ մեկ-երկուսի մասին, որոնց համար սովորական բան են, որոնք անելով ցավ չեն էլ զգում»,- ասել է նախարարը՝ հավելելով, որ կոնկրետ անձանց է նկատի ունեցել և կարող է նրանց ցույց տալ: Ինքնախեղման երևույթը, ըստ նրա, նախարարն իր հետ չի բերել, այն ցավալի է, և դեպքերը չեն աճել, պարզապես հմակարգն է սկսել թափանցիկ աշխատել: Ինքնախեղումը սովորաբար տարբեր պահանջներով է լինում՝ կենցաղային պայմաններից մինչև անթույլատրելի ցանկություններ: Նախարարի խոսքերով՝ կան երկրներ, որտեղ քրեորեն պատժելի արարք է ինքնախեղումը, մեզ մոտ՝ կարգապահական պատիժ է սահմանված:
