Շենգավիթ վարչական շրջանի ընդհանուր իրավասության դատարանում Ալեքսանդր Ազարյանի նախագահությամբ սկսվեց չորս կանանց գործով դատական քննությունը:
Ըստ մեղադրանքի ՝ոստիկանության Շենգավիթի բաժնում այդ չորս կանայք ածելիները ձեռքներին հետապնդել են ոստիկաններին, երկու ոստիկանի հարկադրել են բաժնից փախչել՝ ածելիով վնասելով նրանցից մեկի դաստակը:
Չորս կանանցից երեքին՝ Նարեին, Պայծառին ու Էլմիրային 2013 թվականի դեկտեմբերի 2-ին, գիշերվա ժամը 1-ին մարմնավաճառության կասկածանքով բերման էին ենթարկել ոստիկանության Շենգավիթի բաժին:
Անժելան՝ բերման ենթարկված Էլմիրայի մայրը, ըստ մեղադրանքի, մուտք է գործել ոստիկանության առաջին հարկի միջանցք, վիճաբանել է ոստիկաններ Ալավերդյանի, Մելքումյանի, Նավասարդյանի հետ, չի ենթարկվել ոստիկանների պահանջներին, իր մոտ եղած ածելիով բռնություն գործադրելու սպառնալիքների ներքո փորձել է վնասել ոստիկան Նավասարդյանի դեմքը, հետապնդել է նրան ու ոստիկան Ալավերդյանին:
Բերման ենթարկված երեք կանայք նույնպես, ըստ մեղադրանքի, վիճաբանել են ոստիկանների հետ, չեն ենթարկվել, հրաժարվել են ենթարկվել անձնական զննության, ածելիներով հետապնդել են ոստիկաններին, իսկ Նարեն ածելիով վնասել է ոստիկան Նավասարդյանի դաստակը՝ նրա առողջությանը պատճառելով միջին ծանրության վնաս՝ առողջության տևական քայքայումով:
Չորս ամբաստանյալուհիներից երեքը՝ Նարեն, Պայծառն ու Էլմիրան, կալանքի տակ են, իսկ Անժելայի խափանման միջոցը ստորագրությունն է չհեռանալու մասին:
Անժելան իր հետ դատարան էր բերել ու միջանցքի նստարանին նստեցրել երեք պստիկ երեխաների: Ըստ տեղեկությունների՝ դեպքի օրը նա մանկահասակ երեխաներին իր հետ տարել է ոստիկանություն, սպառնացել ածելիով վնասել երեխաներին, իսկ նրա ու մյուս երեքի գործողությունները խափանող ոստիկանն էլ դաստակի հատվածում վնասվածք է ստացել:
Դատարանն այսօր ճշտեց ամբաստանյալուհիների ինքնությունը:
Անժելան ամենամեծն է՝ 40 տարեկան: Ըստ իր հայտարարության՝ ամուսնալուծված է, չորս երեխա ունի, որոնցից մեծը՝ 22-ամյա Էլմիրան, նրա կողքին նստած է ամբաստանյալների աթոռին, իսկ 5, 7, 8 տարեկան երեխաները խելոք շարվել էին միջանցքի նստարանին ու սպասում էին դատական նիստի ավարտին:
Անժելան հայտնեց, թե հիվանդ է էպիլեպսիայով: Կալանքի տակ եղել է մեկ օր:
Անժելայի դուստր Էլմիրան նշեց, թե ութամյա կրթություն ունի, ամուսնացած չէ, երեխաներ չունի, մարմնավաճառությունը իր հիմնական աշխատանքը չի համարում:
22-ամյա Նարեն հայտնեց, թե միջնակարգ մասնագիտական կրթություն պիտի ունենար, բայց ուսումը կիսատ է թողել: 2 տարեկան երեխա ունի, ով իր հետ քննչական մեկուսարանում է:
26-ամյա Պայծառն ասաց, թե ամուսնալուծված է, 8 տարեկան երեխա ունի իր խնամքին, հիվանդ է սթրեսային էպիլեպսիայով. այդ մասին տեղեկացել է, երբ իրենց այս քրեական գործի շրջանակներում ուղարկել են դատահոգեբուժական փորձաքննության:
Այս գործով մեղադրական եզրակացությունը հաստատած դատախազ Մանուկյանը այլ աշխատանքի է անցել, մեղադրանքը դատարանում կպաշտպանի ավագ դատախազ Կ. Ադամյանը, ով ժամանակ խնդրեց գործի նյութերին ծանոթանալու համար:
Անժելայի շահերի պաշտպանը՝ հանրային պաշտպանի գրասենյակի փաստաբանը այլ գործով զբաղված լինելու պատճառով չէր կարողացել ներկայանալ, բայց զգուշացրել էր դատարանին:
Անժելան նեղացավ պաշտպանից, հայտարարեց. «Մենք մեզ կպաշտպանենք», հետո խոսեց իր անունից. «Ես ինձ կպաշտպանեմ, ի՞նչ ա եղել, չեմ ուզում դատը հետաձգվի»: Բայց քանի որ դատական նիստը այսպես թե այնպես հետաձգվելու էր, Անժելան վերջում հայտարարեց, թե իր պաշտպանից չի հրաժարվում:
Ի տարբերություն Անժելայի՝ Նարեն ու Պայծառը հրաժարվեցին իրենց պաշտպանից՝ հանրային պաշտպանի գրասենյակի փաստաբանից՝ պատճառաբանելով, թե նա ընդամենը մեկ անգամ է հանդիպել իրենց ու իրենց պատկերացրած «խանդավառությամբ» չի աշխատել:
Նարեն ասաց. «Ինքս կարող եմ իմ շահերը պաշտպանել: Մեղքս ընդունել եմ, պաշտպանի կարիք չունեմ»:
Էլմիրան կտրականապես հրաժարվեց հանրային պաշտպանի ծառայություններից: Պայծառը ևս փորձեց հրաժարվել հանրային պաշտպանից, բայց հետո մտքափոխվեց. «Եթե լավ աշխատող փաստաբան լինի, գործով զբաղվի, չեմ հրաժարվի»:
Նարեն էլ հայտարարեց, թե իր հարազատները վճարովի փաստաբանի հետ խոսել են, պարզապես այսօրվա նիստին նա չի կարողացել ներկայանալ:
Նախագահողը հորդորեց, որ ամբաստանյալուհիները պաշտպան ունենալու իրենց իրավունքից օգտվեն, քանի որ մասնագետ փաստաբանը ամեն դեպքում ավելի լավ կպաշտպանի նրանց իրավունքներն ու շահերը, քան՝ իրենք:
Հաջորդ դատական նիստը տեղի կունենա հունիսի 26-ին: