Լևոն Տեր-Պետրոսյանի 15-կետանոց պահանջները շարունակում են մնալ ընդդիմության օրակարգում։ Այսօր ԱԺ հանրապետական պատգամավոր Գագիկ Մելիքյանից փորձեցինք ճշտել, թե իշխանությունը առաջիկայում պատրաստվո՞ւմ է արձագանքել ընդդիմության պահանջներին։
Նա պատասխանեց. «Ես, իհարկե, երկխոսության եզրեր տեսնում եմ և կարծում եմ, որ վերջին հանրահավաքում Լևոն Տեր-Պետրոյանը երկխոսության կոչ էր անում։ Կարծում եմ, որ այդ երկխոսության եզրերը կան։ Դրանից կշահի միայն պետությունը և պետականությունը՝ ինչպես նշում էր հանրապետության նախագահը իր նախորդ մի քանի օրերի ելույթներում, որտեղ մասնավորապես ասվում էր, որ ընդդիմության մեջ էլ կան խոհեմ մտածող մարդիկ, պետականը և պետականությունը վեր դասող մարդիկ։
Կարծում եմ, որ նրանք անպայման նման առաջարկություններով պետք է հանդես գային։ Ըստ երևույթին, սա հենց ընդդիմության կողմից արձագանք էր նախագահ Սերժ Սարգսյանի ելույթներին և մտքերին, որ իրենք, այո, կարող են գնալ երկխոսության կոռեկտ և քաղաքակիթ ճանապարհով»։
Ի դեպ, Գագիկ Մելիքյանը նկատեց, որ այս պահին երկխոսություն սկսելուն ոչինչ չի խանգարում։