Եգիպտոսում բանակային ստորաբաժանումների ու ապստամբ սքվոտերների (դատարկ բնակարանները գրաված անձինք) միջև տեղի ունեցած 4-ժամյա փոխհրաձգության հետևանքով զոհվել է 3, վիրավորվել 13 մարդ: Ինչպես հաղորդում է Associated Press-ը, ևս 15 մարդ կալանավորվել է:
Զինվորական պաշտոնյաների խոսքով՝ բախումները տեղի են ունեցել Կահիրեի հարավային հատվածում՝ Նեղոս գետի կղզում, որի տարածքը պատկանում է զինված ուժերին: Սակայն Հոսնի Մուբարաքի տապալմանը հաջորդած քաղաքական քաոսի ժամանակ այդտեղ անօրինական կերպով վերաբնակվել են շրջակա բնակավայրերի բնակիչները: Երբ զինվորականները փորձել են վերադարձնել կղզու նկատմամբ վերահսկողությունը, սկսվել են բախումները:
Ապստամբները փակել են կղզի տանող ճանապարհը ու բարիկադներ են կառուցել: Պաշտոնական վարկածի համաձայն՝ նրանք առաջինն են կրակ բացել, ինչի հետևանքով վիրավորվել է 5 զինվոր:
Դա դարձել է բանակի մասնակցությամբ առաջին ներքին հակամարտությունն այն ժամանակից ի վեր, ինչ երկրում իշխանության է եկել նախագահ Մուհամմադ Մուրսին:
