Ազգային ժողովի առջև այսօր բողոքի ակցիա անցկացնող «Դեմ եմ» նախաձեռնության ակտիվիստներին մոտեցան ԱԺ ոչ իշխանական չորս ուժերի ներկայացուցիչները` Ժառանգություն խմբակցության ղեկավար Ռուբիկ Հակոբյանը, ՀԱԿ խմբակցության ղեկավար Լևոն Զուրաբյանը, ՀՅԴ-ական պատգամավոր Արծվիկ Մինասյանը և ԲՀԿ-ական Միքայել Մելքումյանը: Վերջիններս ակտիվիստներին նախ տեղեկացրին, որ իրենք արդեն իսկ կարողացան տապալել իշխող մեծամասնության համար կարևոր երկու հարցի քվեարկություն, որի շնորհիվ ՀՀԿ-ականները հրաժարվեցին այսօր որևէ այլ հարցի քվեարկություն կազմակերպելու մտադրությունից:
Արծվիկ Մինասյանը նշեց, որ կենսաթոշակային նոր ռեֆորմի նախագիծն իրենց ներկայացված չի եղել, ուստի անընդունելի է այն ԱԺ օրակարգում ներառելը: Նա տեղեկացրեց, որ նախագիծն այսօր կտեղադրվի ԱԺ կայքում, կոչ արեց ծանոթանալ, ըստ այդմ` որոշել իրենց հետագա քայլերը: Պատգամավորները պատրաստակամություն հայտնեցին պայքարը շարունակել միասնաբար, իրենք` խորհրդարանում, ակտիվիստները` դրսում:
Նախաձեռնության անդամները հեռացան` չբացառելով, որ վաղը դարձյալ կհավաքվեն ԱԺ առջև:
