«Ես քաղաքում եմ ապրում, կով չունեմ, բայց իմ ունեցած բիզնեսը պատրաստ եմ նվիրել վարչապետին»,- երեկ մեզ հետ զրույցում ասաց թոշակառու Սամվել Պետրոսյանը` ի պատասխան վարչապետ Տիգրան Սարգսյանի հայտարարության, թե թոշակներն ու նպաստները չեն ավելանում, որ մարդիկ իրենց անասուններին ու բիզնեսը չօտարեն, դրանցից օգտվելու համար: «Ապշած եմ ուղղակի: Էդ ե՞րբ կառավարությունը տեսավ մեր բիզնեսն ու կովերը, որ նման եզրակացության է եկել: Թոշակներն ու նպաստները չբարձրացնելը նշանակում է մեզ սովի ու ցրտի մատնել էս թանկացումների ժամանակ»,- շարունակեց թոշակառուն:
Վարչապետի նոու-հաուն ապշեցրել էր հատկապես մեզ հետ զրուցած տարեցներին: «Ինչ ասեմ, աղջիկ ջան, եթե իրանք մեզ հետ նման ձևով են վարվում, ուրեմն չեն հարգում մեծերին, իրանց ծնողներին չեն հարգում»,- ասաց 76-ամյա Վիոլետա Վարդանյանը: «Էդ ոնց է, իրենց համար փող կա, մեր համար փող չկա, բա սոցիալական արդարությունը ո՞ւր է: Առանց էդ էլ մի կերպ, ամեն կոպեկը հաշվելով ենք ապրում: Ես երեք երեխա եմ մեծացնում, նորմալ աշխատանք չունենք, նպաստը մի կերպ ենք հերիքացնում: Ինչ ասեմ, չգիտեմ, բայց կով հաստատ չունենք, որ ծախենք»,- դժգոհեց 37-ամյա Հասմիկ Քերոբյանը` շարունակելով. «Թոշակներն ու նպաստները չեն բարձրացնում, երևի որ ընտրակաշառքը ավելի ազդեցիկ լինի ընտրությունների ժամանակ»:
Վարչապետ Տիգրան Սարգսյանը երեկ մասնակցել է Հայաստանի պետական տնտեսագիտական համալսարանում ընթացող «Ազգային տնտեսության մրցակցության բարձրացման հիմնախնդիրները» թեմայով 22-րդ գիտական նստաշրջանին և հայտարարել, թե թոշակներն ու նպաստները չեն բարձրանում, քանի որ կառավարությունը ոչ թե աղքատության, այլ դրա պատճառների դեմ է պայքարում:
«Եթե էդպես է, վարչապետի ասած պատճառները երևի մենք ենք, որովհետև եթե նման պայմաններում ստիպված ենք լինելու ապրել նույն գումարով, ուրեմն էդ պայքարն ուղղակի մեր պես աղքատների դեմ է»,- ասաց մեր զրուցակիցներից մեկը:
Վարչապետը խոսելով սոցիալական ոլորտի մասին` ասել է. «Ինչքան պետությունը շատ գումար է հատկացնում այս ոլորտին, այնքան ամեն տարի սպասելիքներն ավելի մեծ են լինում: Մարդիկ սպասում են, որ թոշակներն ու նպաստներն ամեն տարի 15 տոկոսով բարձրանան, իսկ այն ստանալու սահմանված չափանիշներին համապատասխանելու համար իրենց ունեցած անասունը, բիզնեսն են օտարում»: Նա ասել է, թե ֆինանսական միջոցներն ուղղվելու են կրթության ոլորտին, քանի որ հենց կրթությունն է աղքատ ընտանիքների երիտասարդների գլխավոր խնդիրը, իսկ այդ ընտանիքների աշխատունակ անդամների համար աշխատատեղեր են ստեղծվելու, որոնք, սակայն, ըստ վարչապետի, այնքան էլ չեն հետաքրքրում նրանց:
«Ես չեմ հավատում, որ նման պատասխան լինի վարչապետի կողմից: Ես չեմ հավատում, որ էդ կարգի բան ասած լինի: Դա անհեթեթություն է սկզբից մինչև վերջ»,- մեզ հետ զրույցում տարակուսանք հայտնեց նախկին վարչապետ, ԱԺ պատգամավոր Հրանտ Բագրատյանը: Վերջինս տեղյակ չէ, որ գյուղերում բիզնես օտարեն կամ անասուն ծախեն` նպաստից օգտվելու համար: «Ես տեղյակ չեմ: Մենք գյուղի հետ կապ ունենք, ոչ մի գյուղացի ինձ այդպիսի բան չի ասել: Չեմ հավատում, որ պետական այդ մակարդակի պաշտոնյան էդպիսի բան ասի: Թոշակների հետ անասուն ծախելն ընդհանրապես կապ չունի»: Հիշեցնենք, որ ՀԱԿ-ն առաջարկում էր 10 տոկոսով բարձրացնել կենսաթոշակները, սակայն այդ առաջարկությունը չընդունվեց` «փող չլինելու պատճառով»:
Ի դեպ, «Պետական կենսաթոշակների մասին» ՀՀ օրենքում այս տարի փոփոխություններ են կատարվել, որոնց համաձայն` տարիներ շարունակ Հայաստանի Հանրապետությունից բացակայող կենսաթոշակառուն հետ վերադառնալով՝ կարող է ստանալ միայն վերջին մեկ տարվա կենսաթոշակը: Եթե կենսաթոշակառուն սույն օրենքն ուժի մեջ մտնելուց հետո կրկին դիմում է չվճարված կենսաթոշակի գումարը ստանալու պահանջով, ապա չվճարված կենսաթոշակի գումարները վճարվում են` դիմելու ամսվան նախորդող մեկ տարվա այն ժամանակահատվածի համար, որի ընթացքում անձը կենսաթոշակ ստանալու իրավունք է ունեցել: Օրենքի կիրառումը ևս դժգոհություն է առաջացրել թոշակառուների շրջանում, որ կառավարությունը յուրացնում է իրենց հասանելիք գումարները:
