18 մանկատների և ծերանոցների սննդամթերք մատակարարող տնտեսվարողների հանդեպ Տնտեսական մրցակցության պաշտպանության պետական հանձնաժողովը վարույթներ է հարուցել և առաջիկայում կհրապարակի դրանց արդյունքները: Այսօր Աղվերանում ընթացող «Պետական գնումներ և անբարեխիղճ մրցակցություն» թեմայով երկօրյա սեմինար-քննարկման ժամանակ հայտնեց ՏՄՊՊՀ գլխավոր մասնագետ Մանուկ Միքայելյանը: ՏՄՊՊՀ-ն ստուգել էր 134 բուժհաստատություններ, 18 մանկատներ և ծերանոցներ, դեղերի շուկայում գործող 314 ձեռնարկություններ, 575 մանկապարտեզներ և սննդամթերքի մատակարարում իրականացնող 150 տնտեսվարողների:
«Այժմ հետամուտ ենք, թե ինչ արդյունք են ունենում մեր գործողությունները»,- ասաց նա`հավելելով, որ դեղերի գնումների ուսումնասիրությունից հետո մամուլում տեղ գտան հրապարակումներ, որոնցում որոշ բուժհաստատությունների ղեկավարներ փորձում էին պատճառաբանել, թե հրատապ էր դեղորայք ձեռք բերելը, այդ պատճառով է առանց մրցույթի գնում իրականացվել. «Բայց եթե դա տեղի է ունեցել տարիներ շարունակ, արդարացում չունի»:
Ըստ նրա՝ մրցույթ չհայտարարելը պայմանավորում էին նաև էժան դեղորայքի անորակ լինելով, բայց այս հիմնավորումը նույնպես անհիմն է, քանի որ բացի գնային չափանիշից, կարող էին որակով առաջնորդվել:
Մ. Միքայելյանը հայտնեց, որ այսօր արդեն կանոնավոր հայտարարում են մրցույթներ, գնումների պլանը հրապարակում են գնումների կենտրոնում:
ԳԴՀ Համբուրգի երկրամասային դատարանի նախագահող դատավոր Մարկուս Շնայդերի կարծիքով՝ նույնը վերաբերում է հանրային գնումներին: «Այն հանգամանքը, որ պետական գնումների շրջանակում պետական մարմինը կարող է էժան գներ առաջարկել, դա կարող է դիտվել որպես դեմպինգ և հակամրցակցային գործունեություն»:
Ա. Շաբոյանը փաստեց, որ հիմնականում գնումների ժամանակ առաջարկներ են ներկայացնում առավել խոշորները, որոնց հնարավորությունները ավելի շատ են, և պետական գնումները նպաստում են խոշորացմանը, իսկ փոքր ընկերությունները հնարավորություն չեն ունենում մասնակցել պետական գնումներին, նաև սահմանաչափ կա, որ 1 մլն դրամից ավելիի դեպքում պետք է պետական գնում իրականացվի: «Խոշոր բիզնեսն է շահում պետական գնումներից: Այդ պատճառով ՏՄՊՊՀ-ն օրենսդրական առաջարկություններ է մշակում, որ փոքր ու միջիններն էլ կարողանան մասնակցել գնումներին: Միջազգային ասպարեզում թույլ են տալիս մի քանի փոքր ձեռնարկությունների խմբավորվել և միասին հայտ ներկայացնել»:
