«Ռոսիա սեգոդնյա» լրատվական գործակալության տնօրեն Դմիտրի Կիսելյովի՝ նախօրեին Ազգային ժողովում արած հայտարարությունը, որում նա Հայաստանի անվտանգությունը պայմանավորել է ռուսաց լեզվի իմացության բարձր մակարդակով, զայրացրել է հայ հանրությանը: Նրանցից շատերը նշում են, որ Կիսելյովը հաճախ արտահայտում է մտքեր, որոնցով խնդրի առաջ է կանգնեցնում հենց իր երկրին:
Հանրային խորհրդի անդամ Կարինե Դանիելյանն «Առաջին լրատվական»-ի հետ զրույցում նշեց՝ այն, որ մեզանում՝ հատկապես երիտասարդ սերնդի մոտ, նահանջել է ռուսաց լեզուն, ճիշտ է, այն հաճախ փոխարինվում է անգլերենով:
«Կարծում եմ՝ ճիշտ կլինի, եթե երիտասարդները տիրապետեն և՛ ռուսերենին, և՛ անգլերենին, բայց ինչն է ինձ զարմացնում. Ռուսաստանի պատվիրակությունները գալիս են ՄԱԿ և այնտեղ անգլերեն են խոսում՝ չնայած ՄԱԿ-ի լեզուն նաև ռուսերենն է, և եթե մեր երիտասարդները տեսնում են, որ ռուսերենն իր կամքով ՄԱԿ-ից կարծես փորձում է դուրս գալ, ապա հասկանալի է, որ հաջորդ քայլը… մենք ենք խոսում ռուսերեն: Ռուսները գալիս, խոսում են անգլերեն: Ճիշտ կլինի, եթե միջազգային ասպարեզում ռուսաց լեզուն ամրապնդեն, էդ դեպքում մեր երիտասարդները կհետևեն դրան»,- ասաց նա:
Դիտարկմանը՝ Կիսելյովի ասածը վերջնագի՞ր էր արդյոք, Դանիելյանը նշեց, որ իրոք մեր դիվանագիտությունը, որպես անկախ պետություն, պետք է ավելի ամրապնդվի, մինչդեռ մեր նկատմամբ շատ հարցերում դրսևորվում է կոնկրետ վերաբերմունք. «Դե, Հայաստանն է, էլի, կլռի, կանցնի»:
Ըստ Դանիելյանի՝ պետական մակարդակի ընդվզման կարիք կա: «Դա իրոք խնդիր է, որ մենք, որպես անկախ պետություն, այս տարիների ընթացքում դեռ մեզ չենք դրսևորել այնպես, որ մեզ հետ հաշվի նստեն: Ինձ համար ընդունելի է, որ ՌԴ-ն փորձում է ընդլայնել ռուսաց լեզվի արեալը, ճիշտ կլինի, որ մեր երիտասարդները տիրապետեն ռուսաց լեզվին, բայց ոչ՝ այդ մեթոդներով»,- ասաց նա:
Մանրամասները` տեսանյութում:
