Ազգային ժողովի փոխնախագահ Էդուարդ Շարմազանովն «Առաջին լրատվական»-ի հետ զրույցում անդրադառնալով իշխանություններին ուղղված՝ ոչ իշխանական քառյակի 2 կետից բաղկացած պահանջներին՝ ասաց, որ այդ բոլոր կոչերը, կարծիքները, առաջարկները քննարկման, ուշադրության արժանի են: «Կարող եմ ասել, որ միանգամից աչքի զարնեց երկու կարևոր փաստ: Առաջինը, որ ռադիկալ կոչեր, ռադիկալ պահանջներ չկան: Եվ չկար այսօրվա ամենակարևոր հարցի՝ համակարգային փոփոխությունների, այսինքն՝ սահմանադրական փոփոխությունների վերաբերյալ չորս կուսակցությունների կարծիքը կամ դրա ուղղությամբ նրանց տեսլականը: Նույն 12 կետերում ես տեսա կետեր, որոնց լուծումն ավելի շատ կապված է սահմանադրական բարեփոխումների հետ: Կոնկրետ, ընդդիմությանը վերահսկողական ֆունկցիա օժտելը կարելի է քննարկել, բայց դա պետք է ամրագրվի մայր օրենքում: Եվ կան նմանատիպ հարցեր, որոնք ավելի ճիշտ կլինի քննարկել ոչ թե օրենսդրական, այլ սահմանադրական դաշտում: Ավելացնեմ նաև, որ իշխանությունների օրակարգը հարցերի ընդգրկման առումով շատ ավելի լայն է, քան թե մեր ընդդիմադիր գործընկերներն են ներկայացրել: Այնուամենայնիվ, ընդդիմության ներկայացրած այն հարցերը, որոնք կառուցողական դաշտում են, մենք կքննարկենք: Ավելին, այնտեղ կան կետեր, որոնք արդեն իսկ քննարկվում են իշխանություն-ընդդիմություն ֆորմատով»,- ասաց Է.Շարմազանովը:
Իսկ իշխանությունները կկատարե՞ն ոչ իշխանական ուժերի այդ պահանջները: «Նախ՝ իշխանությունն առաջնորդվում է իր օրակարգով, բայց մի բանում մենք միասնական ենք, դա ԼՂՀ-ի հետ կապված կետն է»,- ասաց Է.Շարմազանովը:
