ԱՄՆ-ի, Իրանի և Եվրամիության դիվանագետների միջև եռակողմ խորհրդակցությունները Թեհրանի միջուկային ծրագրի շուրջ մեկնարկել են Ժնևում։ Այս մասին հաղորդել է իրանյան IRNA տեղեկատվական գործակալությունը։
Նախատեսված երկօրյա խորհրդակցություններում ԱՄՆ պատվիրակությունը ղեկավարում են պետքարտուղարի առաջին տեղակալ Ուիլյամ Բերնսը և պետքարտուղարի քաղաքական հարցերով տեղակալ Ուենդի Շերմանը։ Իսլամական Հանրապետության անունից բանակցում է ԱԳՆ ղեկավարի տեղակալ Աբաս Արագչին։ Եվրամիությունը ներկայացնում է ԵՄ գերագույն հանձնակատարի արտաքին գործերի և անվտանգության քաղաքականության հարցերով տեղակալ Հելգա Շմիդտը։
Ինչպես հաղորդվում է, խորհրդակցությունների մասնակիցները փորձում են ձերբազատվել մամուլի ուշադրությունից։ Փաստորեն միակը, ով տվյալ պահի դրությամբ շփվել է մամուլի հետ, եղել է Արագչին։ Ժնև թռչելիս նա հայտնել է, թե մնում են մի քանի հարցեր, որոնք հարկավոր է լուծել, նախքան Վիեննայում հունիսի 16-20-ը կհավաքվեն Իրանի և «վեցյակի» (ՄԱԿ-ի ԱԽ հինգ մշտական անդամները + Գերմանիան) ներկայացուցիչները։ ԻԻՀ ԱԳՆ ղեկավարի տեղակալը նաև ասել է, թե եռակողմ խորհրդակցություններից հետո Իրանի և ԱՄՆ-ի դիվանագետները կանցկացնեն երկկողմ հանդիպում։
