Իրաքում ապստամբները գրավել են Անբար նահանգի վարչական կենտրոն Ռամադի քաղաքի համալսարանը։ Ռամադիում կառավարական բանակը երկար ամիսների ընթացքում մարտնչում է գրոհայինների դեմ։
Al-Arabiya հեռուստաալիքի տվյալներով՝ պատանդ են վերցվել տասնյակ ուսանողներ ու պրոֆեսորադասախոսական կազմի ներկայացուցիչներ։
Համալիրի տարածքի ելքը շրջափակված է ականապատված ավտոմեքենայով։
AFP-ը, հղում անելով տեղի ոստիկանությանը, հաստատում է համալսարանի գրավման փաստը՝ չճշտելով պատանդների թիվը։ Հաղորդվում է, որ համալսարանի պահպանության բոլոր ծառայողներին գնդակահարել են։ Զոհվածների մասին առայժմ ստույգ տեղեկություն չկա։
AFP-ի տվյալներով՝ բռնագրավումն իրականացրել են «Իրաքի ու Լևանտի իսլամական պետություն» շարժման ջիհադականները։
Համալիրի տարածքը շրջապատել են իրաքյան անվտանգության ծառայություններ ու զինվորականներ։
Իրաքում լարվածության մեծացումը կապված է խոշորագույն իսլամական համայնքների՝ սունիների և շիաների դիմակայության հետ։ Սադամ Հուսեյնի իշխանության օրոք սունիները բարձր դիրքեր էին զբաղեցնում պետական կառույցներում, սակայն նրա տապալումից հետո սունիներին հետ մղեցին շիաները։
