ԱԺ Պետաիրավական հարցերի մշտական հանձնաժողովի այսօրվա նիստում Կառավարության կողմից ներկայացրած «Բնակչության պետական ռեգիստրի մասին» Հայաստանի Հանրապետության օրենքում փոփոխություններ և լրացումներ կատարելու մասին օրենսդրական փաթեթի քննարկումը հետաձգվեց մեկ տարի ժամկետով՝ համաձայն կանոնակարգ – օրենքի պահանջի: Հետաձգման պատճառը դարձավ այն, որ հիմնական զեկուցողը՝ Արտաքին գործերի նախարարի տեղակալ Շավարշ Քոչարյանը նիստից ուշացավ:
Հանձնաժողովի նախագահ Հովհաննես Սահակյանը ներկաներին հորդորում էր ընդամենը մի քանի րոպե սպասել, մինչև հիմնական զեկուցողը կներկայանա: ԱԺ ՀԱԿ պատգամավոր Գագիկ Ջհանգիրյանն առաջարկեց չսպասել գլխավոր զեկուցողին, առաջինը լսել հարակից զեկուցողին, սակայն Սահակյանը տեղեկացրեց, որ չի կարող կանոնակարգ-օրենքը խախտել: Անկախ պատգամավոր Էդմոն Մարուքյանը տեղից նկատեց, որ հիմնական զեկուցողի բացակայության պարագայում, ըստ ԱԺ կանոնակարգ – օրենքի, հարցի քննարկումը մինչև մեկ տարի ժամկետով հետաձգվում է:
Ի վերջո, հանձնաժողովի անդամները համաձայնության եկան, և նախագծի քննարկումը հետաձգվեց:
Լուսանկարը՝ Panorama.am-ի
