«Քաղաքական ուժերի կողմից միանշանակ մոտեցում դեռ չկա: Ինձ մի փոքր մտահոգում է այն, որ քաղաքական ուժերը փորձում են ինչ-ինչ նկատառումներով հստակ չարտահայտել իրենց դիրքորոշումը ոչ միայն կառավարման ձևի փոփոխության, այլև սահմանադրական բարեփոխումների ցանկացած այլ առանցքային հարցադրման շուրջ»,-այսօր Սահմանադրական բարեփոխումների հայեցակարգի հերթական քննարկման ժամանակ «Առաջին լրատվական»-ի հետ զրույցում ասաց Սահմանադրական բարեփոխումների հանձնաժողովի անդամ, արդարադատության նախկին նախարար Գևորգ Դանիելյանը՝ հավելելով, որ այդ տարբեր մոտեցումները լրացուցիչ բարդություններ են առաջացնում խնդիրն ավելի հստակեցնելու և ամփոփելու հարցում: «Ես և հանձանժողովի մի քանի անդամներ մնում ենք այն կարծիքին, որ կառավարման ձևը իրականում չունի այն դերակատարումը, այն արժեքը, որին մենք կարծես թե ականատես ենք լինում: Վերջին հաշվով, կառավարման ձևը, կարևոր հարց լինելով հանդերձ, իր հերթին պայմանավորված, թելադրված է ոչ պակաս կարևոր սահմանադրաիրավական խնդիրներով»:
Դանիելյանը նշեց նաև, թե չի բացառվում, որ իրենք առաջիկայում մի ինչ-որ ժամկետ էլ ավելացնեն հանրային քննարկումների համար, մարզերում քննարկումներ կազմակերպելու համար: «Վերջին հաշվով, սահմանադրությունը ընդունում են ոչ մասնագետները, ոչ էլ քաղաքական ուժերը: Վերջին գնահատականը ժողովրդին է: Պարզապես այս ամենը մեզ համար անհրաժեշտ է այն առումով, որ մենք կկարողանայինք ավելի համարժեք արտացոլել քաղաքական ուժերի դիրքորոշումը սահմանադրական փոփոխությունների արդյունքներում՝ հույս ունենալով, որ եթե քաղաքական ուժերն աջակցում են բարեփոխումների այս կամ այն տարբերակին, ապա այն իր աջակցությունը կստանա նաև ժողովրդի շրջանում»,- ասաց Դանիելյանը:
Նրա խոսքերով՝ իր համար մտահոգիչ է նաև քաղաքական ուժերի այն մոտեցումը, որ եթե չկա սահմանադրական ճգնաժամ, ուրեմն չկա նաև սահմանադրական փոփոխությունների անհրաժեշտություն: «Ճգնաժամի անհրաժեշտություն չկա էլ: Դա վատագույն տարբերակը կլիներ, որ մենք սպասեինք, մինչև ստեղծվեր այդ ճգնաժամը, և ասեինք, որ կա բարեփոխումների հրատապ անհրաժեշտություն»,- նկատեց Գևորգ Դանիելյանը:
Մանրամասները՝ տեսանյութում ։