Չինաստանը տարբեր երկրներում գտնվող սիրիացի փախստականներին 100 մլն յուանի (16 մլն դոլար) չափով մարդասիրական օգնություն կտրամադրի: Երկիրը 60 մլն յուանի (9.6 մլն դոլար) օգնություն էլ Պաղեստինին կտրամադրի:
Նման հայտարարությամբ է հանդես եկել Չինաստանի նախագահ Սի Ցզինպինը Չինաստանի և արաբական երկրների միջև համագործակցության ֆորումի շրջանակում Պեկինում բացված 6-րդ նախարարական հանդիպմանը: Այս մասին փոխանցում է ITAR-TASS-ը:
«Չինաստանը միշտ էլ բարձր է գնահատել հարաբերություններն արաբական երկրների հետ և ձգտել զարգացնել դրանք երկարաժամկետ հեռանկարում»,- ասել է Ցզինպինը՝ հավելելով, որ արաբական երկրների հարցում Չինաստանը հավատարիմ կմնա քաղաքականության 4 ուղղություններին. անսասան աջակցություն կցուցաբերի Մերձավոր Արևելքում խաղաղ գործընթացին և արաբների օրինական իրավունքների պաշտպանությանը, տարածաշրջանում խաղաղության ու կայունության աջակցման նպատակով հարցերի լուծման քաղաքական միջոցի խթանմանը, զարգացման ուղիների որոնման գործում արաբական երկրների աջակցմանը, ինչպես նաև քաղաքականությունների միջև երկխոսության խթանմանը:
Ֆորումի մասնակիցներն են Չինաստանը և ԱՊԼ 22 երկիր:
