Ինչպես հայտնի է, ավարտվել է ֆուտբոլային ակումբային 2013/14թթ մրցաշրջանը:
Այն հրաշալի ընթացք և ավարտ ունեցավ Մադրիդի «Ռեալ»-ի հարձակվող Քրիշտիանու Ռոնալդուի համար, ով իր ակտիվում գրանցեց մի շարք նվաճումներ: Ամբողջ մրցաշրջանի ընթացքում պորտուգալացին մասնակցեց 46 հանդիպման` դառնալով 51 գոլի և 17 գոլային փոխանցման հեղինակ:
Ռոնալդուն արժանացավ աշխարհի լավագույն ֆուտբոլիստին տրվող «Ոսկե գնդակ», եվրոպական մրցաշրջանի լավագույն ռմբարկուին տրվող «Ոսկե խաղակոշիկ» (Լուիս Սուարեսի հետ միասին), Իսպանիայի Լա Լիգայի լավագույն ռմբարկուին տրվող «Պիչիչի» մրցանակներին: Արժե նշել նաև Պորտուգալիայի հավաքականի` 2014 թվականի աշխարհի առաջնության ուղեգիր ձեռք բերելու փաստը, որը մեծամասամբ հենց Ռոնալդուի արժանիքն էր, ակումբի հետ հաղթանակն Իսպանիայի Արքայական գավաթի և Չեմպիոնների լիգայի գավաթի խաղարկություններում:
Քրիշտիանուն միաժամանակ նաև նոր ռեկորդ սահմանեց եվրոպական ակումբային ամենահեղինակավոր մրցաշարի պատմության մեջ` խփած 17 գոլով դառնալով մեկ խաղարկության ընթացքում ամենաշատ գոլեր խփած ֆուտբոլիստը` գերազանցելով Ժոզե Ալտաֆինիի և Լիոնել Մեսսիի նվաճումը:
